უკრაინის სახალხო დამცველი ლუდმილა დენისოვა ექსპრეზიდენტ მიხილ სააკაშვილის გორის სამხედრო ჰოსპიტლიდან რუსთავის პენიტენციურ გადაყვანაზე შეშფოთებას გამოთქვამს და აცხადებს, რომ შთამბეჭდავი ცინიზმია, თუ როგორ გაკეთდა ეს. ამასთან, ომბუდსმენი აღნიშნავს, რომ სააკაშვილისთვის სამედიცინო დახმარების არ გაწევა ადამიანის უფლებათა და ძირითად უფლებათა დაცვის კონვენციის მე-3 მუხლის გარანტირებულ ნორმებს ეწინააღმდეგება.

"შთამბეჭდავი ცინიზმია, რაც მოხდა. ცუდად მყოფი მიხეილი ნების საწინააღმდეგოდ, ღამით ადვოკატების გაფრთხილების გარეშე გადაიყვანეს. მისი ჯანმრთელობის მდგომარეობა კრიტიკულია და შეშფოთებას იწვევს: სამი ჰიპერტონული კრიზის შემდეგ თავს უკიდურესად მძიმედ გრძნობს, რამდენიმე დღით ადრე ის საწოლიდან ვერ ადგა. საჭირო სამედიცინო მომსახურების სრული მოცულობით მას არასოდეს მიუციათ და არ დაუნიშნეს ახალი ექიმი, ხოლო მკურნალობის სტრატეგიის შესახებ გადაწყვეტილება დამტკიცებული იყო სხვადასხვა პროფილის ექიმების მიერ", — აცხადებს დენისოვა.

უკრაინის სახალხო დამცველის განცხადებით, საქართველოს ხელისუფლების წარმომადგენლების ასეთი ქმედებებს შეფასებულია, როგორც წამება და უკრაინის მოქალაქის მიხეილ სააკაშვილისთვის სიცოცხლის უფლების ჩამორთმევა, რაც წარმოადგენს სამოქალაქო და პოლიტიკურ უფლებათა საერთაშორისო ხელშეკრულების მე-6, მე-7, მე-9, მე-14, მე-18 მუხლების დარღვევას, რომელიც საქართველოს მიერ 2002 წელს რატიფიცირდა.

დენისოვა მიმართავს საქართველოს სახალხო დამცველს, ნინო ლომჯარიას სააკაშვილის უფლებებისა და თავისუფლებების დაცვის შემოწმების მიზნით მესამე პრეზიდენტი რუსთავის სასჯელაღსრულების დაწესებულებაში მოინახულოს. ამასთან, ის სთხოვს უკრაინის ელჩს საქართველოში მიხეილ სააკაშვილის საკონსულო დახმარების გაწევა უზრუნველყოს.

"მოვუწოდებ უცხო ქვეყნის სახელმწიფოებს და საერთაშორისო ორგანიზაციებს დაგმონ საქართველოს თანამდებობის პირთა ქმედებები, რომლებიც არღვევენ უკრაინის მოქალაქის მიხეილ სააკაშვილის უფლებებს და მოვითხოვთ საქართველოს ხელისუფლებისგან მისი უფლებების აღდგენას", — აცხადებს ომბუდსმენი.

გუშინ, 29 დეკემბერს სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება პენიტენციურმა სამსახურმა ინფორმაციის გავრცელებიდან 9 საათის შემდეგ გაავრცელა და დაადასტურა, რომ სააკაშვილი რუსთავის ციხეშია.

დღეს, 30 დეკემბერს ექსპრეზიდენტის ადვოკატმა, ნიკა გვარამიამ რუსთავის პენიტენციურ დაწესებულებაში სააკაშვილის მონახულების შემდეგ განაცხადა, რომ მესამე პრეზიდენტზე ფიზიკური ძალადობა არ განხორციელებულა. გვარამია თქვა, რომ სააკაშვილს წინააღმდეგობის გაწევის ძალა არ ჰქონდა, რადგან საძილე მედიკამენტებით გაბრუებული იყო და მაღალი წნევა ჰქონდა.

ამავე თემაზე:

• "ძალიან სუსტადაა, ყალბი დიაგნოზით არის გამოწერილი" — ადვოკატები სააკაშვილს შეხვდნენ