ქართული ოცნების დეპუტატის, ნინო წილოსანის განცხადებით, ექსპრეზიდენტი მიხეილ სააკაშვილი ამდენი ხნის განმავლობაში პრივილეგირებულ მდგომარეობაში იყო, რაც "ერთხელ და სამუდამოდ" უნდა დასრულდეს.

"მისი და მისივე თანამოაზრეების მცდელობით, ამდენი ხნის მანძილზე იყო პოზიტიური დისკრიმინაცია. ვგულისხმობთ იმას, რომ ყველა სხვა პატიმრისგან განსხვავებით, ის იყო პრივილეგირებულ მოცემულობაში. ამიტომ ეს, ალბათ, ერთხელ და სამუდამოდ უნდა დასრულდეს", — განაცხადა წილოსანმა.

გუშინ, 29 დეკემბერს სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება უწყებამ მხოლოდ ახლა გაავრცელა.

დღეს პენიტენციურმა სამსახურმა ინფორმაციის გავრცელებიდან 9 საათის შემდეგ, დაადასტურა, რომ სააკაშვილი რუსთავის ციხეში ნამდვილად გადაიყვანეს.