ჰარი პოტერი და ფილოსოფიური ქვის ფილმის გამოსვლიდან 20 წელი გავიდა. ამ განსაკუთრებული თარიღის აღსანიშნავად, 2022 წლის პირველ იანვარს სპეციალურ გადაცემას, სახელად Harry Potter 20th Anniversary: Return to Hogwarts ვიხილავთ. როგორც ჩანს, გადაცემა საინტერესო კადრს მიღმა ფაქტების გამხელის გარეშე არ ჩაივლის.

მაგალითად, როგორც უცხოური მედიები წერენ, ემა უოტსონმა და რუპერტ გრინტმა გაგვიმხილეს, რომ ჰერმიონისა და რონის როლების შესრულებამ თავს წარმოუდგენელი წარმატება დაატეხათ, რაც მათთვის სტრესული აღმოჩნდა. სწორედ ამიტომ ემა და რუპერტი ფილმებიდან წამოსვლაზე ფიქრობდნენ.

როგორც ჩანს, ეს გრძნობა არც დენიელ რედკლიფისთვის ყოფილა უცხო:

"ამის შესახებ არასდროს გვისაუბრია. ალბათ, ამ ფიქრებს დამოუკიდებლად, ჩვენით ვუმკლავდებოდით. ვერ წარმოგვედგინა, რომ, სავარაუდოდ, ყველას მსგავსი გრძნობები გვქონდა", — ამბობს დენიელი.

სტრესსა და შფოთვაზე, რომელთან გამკლავებაც ემა უოტსონს უხდებოდა, რეჟისორმა დევიდ იეტსმა და ტომ ფელტონმაც ისაუბრეს. რეჟისორის თქმით, კარგად ახსოვს, როგორ საუბრობდნენ პროდიუსერები იმაზე, თუ როგორ მერყეობდა ემა მომდევნო ფილმებში დაბრუნებაზე. ტომ ფელტონმა, რომელიც ფილმებში დრაკო მალფოის განასახიერებს, აღიარა, რომ ემა მთავარი როლების შემსრულებლებს შორის ერთადერთი გოგო იყო და თავსაც სხვებთან შედარებით მარტოსულად გრძნობდა.

"ხალხს დაავიწყდა, რამდენად მძიმე საქმეს შეეჭიდა და რა კარგად გაართვა ამ ყველაფერს თავი. დენსა და რუპერტს ერთმანეთი, მე კი ჩემი მეგობრები მყავდა მაშინ, როცა ემა არა მხოლოდ ყველაზე პატარა, არამედ მარტოსულიც იყო", — იხსენებს ტომ ფელტონი.

ამის მიუხედავად, ემამ აღიარა, რომ საბოლოოდ არავის დარწმუნება არ დასჭირდა და ფილმებში დარჩენა კოლეგებისა და ფანების მხარდაჭერის გამო გადაწყვიტა.

"ფანებს გულწრფელად უნდოდათ, რომ საქმე კარგად გამეკეთებინა, ჩვენ კი გულწრფელად ვუჭერდით ერთმანეთს მხარს. მშვენიერია, არა?" — ამბობს ემა.

პირველ იანვრამდე სულ ცოტა დრო რჩება და ჩვენც ერთი სული გვაქვს, როდის გავიგებთ უფრო მეტს ჩვენი საყვარელი მსახიობების შესახებ!

ამავე თემაზე: