უზენაესი სასამართლოს მოსამართლეობის კანდიდატის, ამირან ძაბუნიძის განცხადებით, წინა ხელისუფლების დროს სასამართლოს მიმართ ასეთი კრიტიკული დამოკიდებულება არ ახსენდება. მისი თქმით, დღეს მედიასაშუალებები უფრო ბევრ დროს უთმობენ ამ მიმართულებას და "საკმაოდ ძვირადღირებულ ეთერებს" ამზადებენ.

დეპუტატ ლევან იოსელიანის კითხვას, ადრე, ამის მიზეზი, თავისუფალი მედიის შეზღუდვა ხომ არ იყო, მოსამართლე პასუხობს:

"მაშინ, თუ ასეა, ეს ამ ხელისუფლების დამსახურებაა".

ამასთან, იოსელიანის კითხვაზე, იყო თუ არა ერთ-ერთი გამოწვევა მოსამართლის დამოუკიდებლობის ხარისხი, ის აცხადებს, რომ დღევანდელთან შედარებით, შეიძლება იმ დროის მოსამართლე "ასეთი გაბედული" ვერ ყოფილიყო.

"თუნდაც, დისციპლინარული კუთხით, შეიძლებოდა მოსამართლის პასუხისგებაში მიცემა იმიტომ, რომ ვთქვათ, არასწორად განმარტა კანონი, რაც ცალსახად არ არის სწორი [...] თუნდაც ამ ფაქტორებიდან გამომდინარე, შეიძლებოდა, ისეთი გაბედული ვერ ყოფილიყო იმ დროის მოსამართლე, როგორც დღევანდელი მოსამართლე არის გაბედული", — აღნიშნა მან.

იოსელიანმა მას, ასევე, ჰკითხა, თუ იმ დროის დამოუკიდებლობის ხარისხი სტანდარტებს არ შეესაბამებოდა, უნდა იყვნენ თუ არა ეს მოსამართლეები დღეს უზენაეს სასამართლოში კონკრეტულ თანამდებობაზე, ძაბუნიძე აცხადებს, რომ პერსონალურად ადამიანებში არ ყოფილა პრობლემა და კანონში იყო.