იუსტიციის მინისტრის, რატი ბრეგაძის განცხადებით, თუ ყოფილი პრეზიდენტის მიხეილ სააკაშვილის ჯანმრთელობის მდგომარეობა რუსთავის ციხეში გადაყვანის შემდეგ გაუარესდება, მას გლდანში გადაიყვანენ.

"თუკი შესაძლებელია, რომ პრობლემა შეექმნას ჯანმრთელობას, არსებობს გლდანის მე-18 დაწესებულება, სადაც გადაგვყავს ხოლმე ჩვეულებრივად ყველა პატიმარი. ისიც იქნება გადაყვანილი ამ დაწესებულებაში, როგორც ეს იყო წინა შემთხვევაში. მას მიაწოდეს ყველა საჭირო სამედიცინო დახმარება, მათ შორის მე-18 დაწესებულებაში. ეს არის სტანდარტი, რომელიც ვრცელდება ყველა პატიმართან მიმართებაში და ბუნებრივია, კანონის წინაშე გამონაკლისი არავინ არ არის", — თქვა მან.

პენიტენციური სამსახურის განცხადებით, გორის სამხედრო ჰოსპიტალმა 27 დეკემბერს მიხეილ სააკაშვილის გაწერის გადაწყვეტილება მიიღო, რასაც, მათი თქმით, ექსპრეზიდენტი არ დაემორჩილა და წნევის ცვალებადობა აღენიშნა. უწყების ცნობით, ამის გამო, რუსთავის ციხეში მისი გადაყვანა დროებით გადავადდა.

27 დეკემბერს, მთელი საღამოს განმავლობაში ვრცელდებოდა ინფორმაცია გორის სამხედრო ჰოსპიტალიდან მიხეილ სააკაშვილის შესაძლო გადაყვანის შესახებ. თუმცა ამის შესახებ ინფორმირებულრები არ იყვნენ სააკაშვილის ადვოკატები და ოჯახის წევრები.

მოგვიანებით სახალხო დამცველის წარმომადგენელი ანა ჯანიაშვილი გორის ჰოსპიტალში მივიდა. როგორც მას სააკაშვილმა უთხრა, აპირებდნენ ყოფილი პრეზიდენტის რუსთავის ციხეში გადაყვანას. ამასთან, ომბუდსმენის წარმომადგენელმა თქვა, რომ სააკაშვილმა გონება დაკარგა. ამ შემთხვევას სახლხო დამცველი შეისწავლის.

სააკაშვილის ადვოკატის, ნიკა გვარამიას განცხადებით კი, ექსპრეზიდენტის გორის სამხედრო ჰოსპიტლიდან გაყვანის უფლება არავის ჰქონდა.