გარემოს დაცვისა და სოფლის მეურნეობის მინისტრი, ლევან დავთაშვილი აცხადებს, რომ არ არის აუცილებელი ჯანდაცვის მინისტრი იყოს "სამედიცინო პროფესიის". მან ზურაბ აზარაშვილზე საუბრისას მის მენეჯერულ გამოცდილებაზე გაამახვილა ყურადღება.

"ჯანდაცვის სამინისტრო არ არის მხოლოდ ჯანდაცვის სამინისტრო. ჩვენ შემოკლებით ვეძახით, მაგრამ, ჯანდაცვის სამინისტროს მანდატი არის ძალიან ფართე. ის გულისხმობს დასაქმების საკითხებს. ბევრ ქვეყანაში, როგორც წესი, შრომის სამინისტროები საერთოდ ცალკეა ხოლმე. არსებობს სოციალური საკითხები, დევნილთა საკითხები და ა.შ. ჯამში, ეს არის ქვეყნის ბიუჯეტის მესამედი, როგორც თქვენ გაიგეთ, შესაბამისად, მას სჭირდება მაქისმალური პასუხისმგებლობით და გამოცდილებით მართვა.

როგორც ბევრ ქვეყანაში, არ არის აუცილებელი იყოს ასეთი მნიშველოვანი პოლიტიკური თანამდებობის პირი კონკრეტულად სამედიცინო პროფესიის. აქ არის ძალიან მნიშვნელოვანი, რომ მას ჰქონდეს მართვის კარგი უნარები და გამოცდილება. სწორედ ამ პრინციპით იყო დღევანდელი მინისტრი შერჩეული", — განაცხადა დავითაშვილმა.

კითხვას, არის თუ არა აზარაშვილისი შვილის ნათლია პრემიერმინისტრი ირაკლი ღარიბაშვილი და შეარჩიეს თუ არა ის ჯანდაცვის მინისტრის პოზიციაზე დასანიშნად ამ პრინციპით, დავითაშვილმა ასე უპასუხა:

"არ მაქვს ნამდვილად არანაირი ინფორმაცია".

დღეს, მთავრობის სხდომის დაწყებამდე, ირაკლი ღარიბაშვილმა განაცხადა, რომ ჯანდაცვის ახალ მინისტრად ზურაბ აზარაშვილს ნიშნავს. წარდგენისას ღარიბაშვილმა აღნიშნა, რომ აზარაშვილი "არის გაზრდილი ექიმის ოჯახში".

ზურაბ აზარაშვილი ჯანდაცვის მინისტრობამდე თავდაცვის მინისტრის პოსტს იკავებდა, იქამდე კი იყო ამავე უწყების სამხედრო სამეცნიერო-ტექნიკური ცენტრ დელტას გენერალური დირექტორი. სამინისტროს საიტზე განთავსებულ აზარაშვილის ბიოგრაფიის მიხედვით, მას ჯანდაცვის სფეროში მუშაობის გამოცდილება არ აქვს.