უკრაინის პრეზიდენტი ვოლოდიმირ ზელენსკი უკრაინის NATO-ში გასაწევრიანებლად ძალიან მკაფიო ვადებს ითხოვს. ზელენსკის თქმით, წლების განმავლობაში ლოდინი ყველას დემოტივაციას იწვევს.

"დღეს ჩვენ ვერ მივიღებთ თეზისს, რომელიც დღესაც ძალიან პოპულარულია, ევროკავშირში გაწევრიანება 30 წელიწადში, NATO კი სადღაც 50 წელიწადში, ეს ყველას დემოტივაციას იწვევს. იმისათვის, რომ სწრაფად ვიმოქმედოთ, რაიმე მეორეხარისხოვან საკითხებზე დრო არ უნდა დავკარგოთ. ძალიან კონკრეტულად ვიტყვი. მისი მიღება 2022 წელს გვსურს", — განაცხადა ზელენსკიმ.

საგარეო პოლიტიკურ მიზნებზე საუბრისას უკრაინის პრეზიდენტმა განაცხადა, რომ მათ მისაღწევად უკრაინული დიპლომატია უფრო ჩქარი უნდა გახდეს.

რუსეთი მოითხოვს, გაუქმდეს 2008 წლის ბუქარესტის სამიტის გადაწყვეტილება, რომლის მიხედვითაც საქართველო და უკრაინა NATO-ში უნდა გაწევრიანდნენ. სერგეი ლავროვის უწყებამ "რუსეთის უსაფრთხოების დაცვის" მოტივით მოთხოვნებით სავსე განცხადება გამოაქვეყნა, რომელშიც დასავლეთი, ყველაზე მეტად კი აშშ და NATO-ს წევრი ქვეყნების არის გაკრიტიკებული.

რუსეთის საგარეო საქმეთა სამინისტროს განცხადებას NATO-ს გენერალური მდივანი იენს სტოლტენბერგი გამოეხმაურა. სტოლტენბერგის განცხადებით, ალიანსის პოზიცია უცვლელი რჩება და ყველა ერს აქვს უფლება საკუთარი გზა აირჩიოს.