გაერთიანებული ერების ორგანიზაციაში ამერიკის ელჩმა, ნიკი ჰეილიმ, მკაცრად გააკრიტიკა რუსეთი და სირიის მთავრობა უდანაშაულო მოსახლეობაზე ქიმიური იარაღით თავდასხმის გამო და განაცხადა, რომ თუ გაერო არ იმოქმედებს, ამერიკა მზადაა, თავისი ძალა გამოიყენოს სირიაში სამოქალაქო ომის შესაჩერებლად. ინფორმაციას CNN ავრცელებს.

"გუშინ დილით, ჩვენ გამოგვაფხიზლა ბავშვების სურათებმა სირიიდან. მათ პირიდან დუჟი მოსდიოდათ, იტანჯებოდნენ კრუნჩხვებით და სასოწარკვეთილი მშობლების მკლავებში იწვნენ. ჩვენ ვნახეთ ბავშვების სიცოცხლეწართმეული სხეულები, რომლებიც რიგებად იწვნენ. ზოგი ჯერ კიდევ პამპერსით იყო. ქიმიური იარაღით თავდასხმის შედეგად რამდენიმე მათგანის ჭრილობები ადვილად შესამჩნევი იყო.

შეხედეთ ამ სურათებს. ჩვენ მათზე თვალებს ვერ დავხუჭავთ. ჩვენ საკუთარ თავებს არ უნდა მივცეთ უფლება, არ აიღონ მოქმედების პასუხისმგებლობა" - განაცხადა ჰეილიმ.

"რუსეთი მუდამ სხვებს ადანაშაულებს. აშკარაა, რომ რუსეთს, ასადსა და ირანს მშვიდობა არ სურთ. კიდევ რამდენი ბავშვი უნდა დაიღუპოს, რომ რუსეთი შეწუხდეს? ამერიკა სირიის მოსახლეობაზე გუშინდელ თავდასხმას ყველაზე სამარცხვინო ფაქტად აფასებს და კიდევ ერთ მტკიცებულებად, რომ სირიის მთავრობისთვის მისი მოსახლეობა არაფერს წარმოადგენს.

თუ ჩვენ არ შეგვიძლია, რომ მათ ქიმიური იარაღის გამოყენება ავუკრძალოთ, მაშინ მის საზღვრებთან კონფლიქტს როგორ მოვაგვარებთ?

გაერომ მარცხი განიცადა თავისი მოვალეობის ერთხმად შესრულების დროს. ხანდახან დგება მომენტი, როდესაც თავად უნდა გადადგა დამოუკიდებელი ნაბიჯები" - დასძინა მან.

სირიელი აჯანყებულების მიერ კონტროლირებად ტერიტორიაზე, იდლიბის პროვინციაში, 4 აპრილს, სავარაუდოდ ქიმიური იარაღი გამოიყენეს. აჯანყებულები და დასავლური სახელმწიფოები მიიჩნევენ, რომ ბომბები მომწამლავი ნივთიერებებით, ასადის რეჟიმმა, ან მისმა მოკავშირეებმა ჩამოაგდეს.

თავდასხმას ათეულობით მშვიდობიანი მოსახლეს სიცოცხლე ემსხვერპლა, მათი დიდი ნაწილი ბავშვია.