საპარლამენტო ფრაქციის შესაქმნელად პარტია ლელოს ენმ-ის დეპუტატი დილარ ხაბულიანი შეუერთდება. როგორც On.ge-ს პარტიის პრესსამსახურში უთხრეს, უკვე შეიტანეს განაცხადი პარლამენტში და ლელო ისევ ფრაქცია იქნება. მათივე თქმით, ეს ენმ-ის დეპუტატთან შეთანხმებით მოხდა.

On.ge-ს ნაციონალური მოძრაობის დეპუტატმა დავით კირკიტაძემ უთხრა, რომ ეს არის ტექნიკური გადაწყვეტილება, რათა არ დაიშალოს ოპოზიციური ფრაქცია, რომელიც მნიშვნელოვანი საპარლამენტო ბერკეტია.

ფრაქცია ლელო — პარტნიორობა საქართველოსთვის დაშლის საკითხი დღის წესრიგში მას შემდეგ დადგა, რაც მამუკა ხაზარაძეს დეპუტატის მანდატი ვადაზე ადრე, საკუთარი მოთხოვნის საფუძველზე შუეწყვიტეს. ფრაქციაში წევრთა მინიმალური რაოდენობა 7 დეპუტატია, ხაზარაძის გარეშე კი ლელოს ფრაქციაში 6 დეპუტატი დარჩა, ესენია: ბადრი ჯაფარიძე, სალომე სამადაშვილი, ანა ნაცვლიშვილი, დავით უსუფაშვილი, შალვა შავგულიძე და არმაზ ახვლედიანი.

ლელოს თავმჯდომარე, მამუკა ხაზარაძე აცხადებდა, რომ მანდატზე უარის თქმით ფრაქციის მუშაობას ხელი არ შეეშლებოდა და განიხილებოდა მისი ჩანაცვლება.