მამუკა ხაზარაძემ, ბადრი ჯაფარიძემ და ავთანდილ წერეთელმა ე.წ. ფულის გათეთრების საქმეზე მიმდინარე სასამართლო სხდომა პროტესტის ნიშნად დატოვეს. პროცესი დღეს 11:00-ის შემდეგ მიმდინარეობდა.

"ეს არის ფალსიფიცირებული სასამართლო, გადაეცით თქვენს უფროსს და ბიძინა ივანიშვილს", — განაცხადა ხაზარაძემ სხდომის დატოვების დროს.

სამ ბრალდებულს პროკურატურა ფულის გათეთრებას ედავება. 2019 წლის 8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად, სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბადრი ჯაფარიძე ფიგურირებდნენ.