27 თებერვალს საქართველოში დაბრუნდა მალაიზიაში ნარკოტრეფიკის ბრალდებით დაკავებული ბაბუცა გორდაძე. ინფორმაციას რუსთავი 2 ავრცელებს.

ბაბუცა გორდაძე 2010 წლის 24 ოქტომბერს მალაიზიის ერთ-ერთ სასტუმროში დააკავეს. მას ქვეყანაში ნარკოტიკული საშუალება ამფეტაფინის შემცველი აბების შეტანა ედებოდა ბრალად, რომლებიც სამართალდამცველებმა მის ბარგში არსებულ სურათის ჩარჩოებში აღმოაჩინეს. ბაბუცა გორდაძის დაკავებას იგივე დანაშაულის გამო დარეჯან კოხტაშვილის დაპატიმრება უძღოდა წინ.

ბრალდებულებს მალაიზიის კანონის მიხედვით სიკვდილით დასჯა ემუქრებოდათ. 11 ნოემბერს საქართველოს შსს-ში ბაბუცა გორდაძის მეუღლე, ელდარ დავითიანი გამოცხადდა, რომელმაც აღიარა, რომ ორივე ქალს ნარკოტიკული ნივთიერების შემცველი აბები თავად ჩაუდო ხელბარგში, მათ კი ამის შესახებ არაფერი იცოდნენ.

პროკურატურის განცხადებით, დავითიანის აღიარებამ ორივე ქალს სიკვდილის განაჩენი აარიდა. 2015 წელს საქართველოს პარლამენტის ვიცე-სპიკერმა მანანა კობახიძემ დარეჯან კოხტაშვილი მოინახულა. მისი განცხადებით, მსჯავრდებულები შედარებით კარგ პირობებში იყვნენ და ისინი საქართველოში 2016 წელს დაბრუნდებოდნენ.

ამჟამად ელდარ დავითიანი საქართველოში იხდის სასჯელს. საქართველოში დაბრუნებულ ბაბუცა გორდაძეს ჟურნალისტებთან კომენტარი არ გაუკეთებია. მისი ახლობლების განცხადებით, მას ჯანმრთელობის პრობლემები აქვს და თბილისში მკურნალობას აპირებს.

დარეჯან კოხტაშვილს სასჯელის ვადა 2016 წლის მეორე ნახევარში ეწურება.