ექსპრეზიდენტ მიხეილ სააკაშვილის განცხადებით, გონების დაკარგვის მეორე დილას გლდანის მე-18 სამედიცინო დაწესებულებაში ე.წ. შუმოკი მოუწყვეს. სააკაშვილი ჰყვება, რომ ისმოდა შეძახილები, კარების ბრახუნი და გარშემო არც ბადრაგი და არც სამედიცინო პერსონალის წარმომადგენლები არ იყვნენ. ექსპრეზიდენტის თქმით, თითქმის ერთი საათი გაგრძელდა.

"როდესაც გონება დავკარგე და მეორე დილას ძალიან ცუდად ვიყავი, ნუ, გასაგებია როგორც ვიყავი. თვლიდნენ ექიმები, ნუ, როგორც ამასწინათ ერთ-ერთმა მითხრა, რომ 2-3 დღე მქონდა დარჩენილი სიცოცხლის. დილის 7 საათზე მომიწყვეს "შუმოკი", თან როგორ, ე.ი, წინა "შუმოკები" იყო უბრალოდ ჩემი დედის გინება, ხმაური, ეხლა იყო "მოვდივართ, მოვდივართ, მოვდივართ", დაიწყო კარებმა ბრახუნი, ბადრაგი არსად არ იყო და არცერთი სამედიცინო პერსონალი არსად არ იყო და იყო სრული შთაბეჭდილება, თითქმის ერთი საათი განმავლობაში, რომ ანგრევენ კარებს და შემოდიან. ეს იყო აბსოლუტურად ხელოვნურად დადგმული, დაორგანიზებული ნაწილი იმ წამებისა, რომელიც იქ ხდებოდა", — განაცხადა მან.

ამ წუთებში თბილისის საქალაქო სასამართლოში, მოსამართლე ბადრი კოჭლამაზიშვილი ე.წ. პიჯაკების, ანუ ფულის გაფლანგვის საქმეს განიხილავს. ადვოკატებმა საქმის პროკურორის აცილება მოითხოვეს, რაც მან არ დააკმაყოფილა.

პარალელურად, საქალაქო სასამრთლოსთან ექსპრეზიდენტის მხარდამჭერების აქცია იმართება. ადგილზე მობილიზებულია პოლიცია.