ეკონომიკის მინისტრი ნათია თურანავა აცხადებს, რომ საარბიტრაჟო სასამართლოში რუსულ კომპანია Inter RAO-სთან მიმდინარე დავა ადასტურებს, რამდენად მნიშვნელოვანია ენერგეტიკული დამოუკიდებლობა საქართველოსთვის. მისი განცხადებით, მიუხედავად იმისა, რომ საერთაშორისო არბიტრაჟმა Inter RAO-ს პოზიციები ნაწილობრივ გაიზიარა (ისინი ითხოვდნენ 200 მილიონამდე კომპენსაციას და ამ ეტაპზე, საუბარია მხოლოდ 80 მილიონზე), მიაჩნია, რომ აბსოლუტურად სწორი გადაწყვეტილებაა, ტარიფები მომხმარებლისთვის არ გაზარდონ, მათ შორის არც თელასისთვის გადასახდელი ტარიფი.

"ეს შემთხვევა კიდევ ერთხელ მიგვანიშნებს, თუ რამდენად მნიშვნელოვანია საქართველოსთვის, მივაღწიოთ ენერგეტიკულ დამოუკიდებლობას და განვავითაროთ საკუთარი ენერგოგენერაციის წყაროები, რათა ნაკლებად ვიყოთ ნებისმიერი ქვეყნის ნება-სურვილზე დამოკიდებულები.", — განაცხადა თურნავამ.

მისივე შეფასებით, დენის ტარიფი დამოუკიდებელი მარეგულირებლის, სემეკის მიერ ძალიან გამჭვირვალე მეთოდოლოგიაზე დაყრდნობით დგინდება და ის მოთხოვნა, რომ ტარიფები უფრო მაღალი უნდა ყოფილიყო, უსაფუძვლოა.

"სწორედ ამიტომ იუსტიციის სამინისტრომ გაასაჩივრა ეს გადაწყვეტილება და ჩვენ აბსოლუტურად მყარად ვდგავართ ამ პოზიციაზე", — აღნიშნავს თურნავა.

სტოკჰოლმის საარბიტრაჟო ტრიბუნალმა საქართველოს Inter RAO-ს სასარგებლოდ 80,5 მილიონის გადახდა დააკისრა, რაც საქართველოს იუსტიციის სამინისტრომ გაასაჩივრა. საქართველოს მთავრობა მიიჩნევს, რომ 2014 წელს ტარიფები სწორად იქნა განსაზღვრული, ამიტომ არბიტრაჟის გადაწყვეტილება, როგორც დაუსაბუთებელი, გასაჩივრებულია სტოკჰოლმის სასამართლოში. საკითხზე სამართლებრივი დავა გრძელდება.