ნიუ ჰოსპიტალსის კლინიკური დირექტორი გიორგი კორძახია რუსთავი 2-თან საუბრისას აცხადებს, რომ შს მინისტრის ყოფილი მოადგილის გელა ხვედელიძის მდგომარეობა ამჟამად დამაკმაყოფილებელია. ექიმის თქმით, ხვედელიძეს სახის ძვლების მოტეხილობა ჰქონდა და უკვე ჩაუტარდა ოპერაცია.

გელა ხვედელიძეს გუშინ, 3 აპრილს საკუთარ სახლთან თავს დაესხნენ. შსს-ს ცნობით, გამოძიება სისხლის სამართლის კოდექსის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.

გაზეთ ქრონიკა პლიუსის რედაქტორის ელისო კილაძის მტკიცებით, გელა ხვედელიძეზე თავდასხმა, სახელმწიფო უსაფრთხოების სამსახურის ხელმძღვანელის მოადგილის, იოსებ გოგაშვილის შურისძიება იყო

გელა ხვედელიძე შინაგან საქმეთა სამინისტროში ირაკლი ღარიბაშვილის მინისტრობისას მუშაობდა. 2013 წლის მაისში გელა ხვედელიძე დააკავეს ერთ-ერთი მოქალაქის პირადი ცხოვრების ამსახველი კადრების გავრცელების ბრალდებით. ხვედელიძე თავდაპირველად ბრალს აღიარებდა, მოგვიანებით კი მან ჩვენება შეცვალა. ბრალდებულმა მაღალჩინოსანმა საპატიმრო მაშინ გირაოს საფუძველზე დატოვა, მოგვიანებით, ის სასამართლომ დამნაშავედ სცნო წარდგენილ ბრალდებაში და ერთწლიანი პირობითი სასჯელი მიუსაჯა.