პოლონეთის პროკურატურის ინფორმაციით, ორმა რუსმა ავიადისპეჩერმა და ერთმა რუსმა ოფიციალურმა პირმა წინასწარგანზრახვით ხელი შეუწყეს 2010 წლის ავიაკატასტროფას, რომელსაც პოლონეთის პრეზიდენტი ლეხ კაჩინსკი ემსხვერპლა. ინფორმაციას როიტერსი ავრცელებს.

ქვეყნის მთავარი პროკურორის, მარეკ პაზიონეკის თქმით, ახალი მტკიცებულებები აშკარას ხდის, რომ კატასტროფაში დამნაშავეები ორი რუსი საჰაერო მაკონტროლებლები იყვნენ.

მისი თქმით, მესამე პირს, რომელიც რუსეთის ოფიციალური პირია, ბრალად ედება კატასტროფის გამომწვევი მიზეზების ხელმძღვანელობა.

პროკურორი აცხადებს, რომ მათ გაშიფრეს თვითმფრინავის პილოტებსა და რუს ავიადისპეჩერებს შორის საუბრის ჩანაწერი, რამაც გამოძიებას ახალი მტკიცებულება შეჰმატა.

ბრალდებას უარყოფს კრემლის პრესსპიკერი დიმიტრი პესკოვი:

"ტრაგედიის გამომწვევი მიზეზები შესწავლილია და ჩვენ ამ დასკვნებს არ ვეთანხმებით".

ავიაკატასტროფა 2010 წლის 10 აპრილს, რუსეთის ოლქ სმოლენსკის სიახლოვეს მოხდა. მას პოლონეთის პრეზიდენტი ლეხ კაჩინსკი, პირველი ლედი მარია კაჩინსკა და თვითმფრინავის ბორტზე მყოფი 94 პირი ემსხვერპლა. მათ შორის იყვნენ პოლიტიკური ლიდერები, პოლონეთის სამხედრო და სასულიერო პირები. ეს ტრაგედია მეორე მსოფლიო ომის შემდეგ ყველაზე დიდ კატასტროფად შეფასდა, რომელიც პოლონეთს დაატყდა თავს.

პოლონეთის პროკურატურა ასევე აცხადებს, რომ მათ გახსნეს დაღუპულების კუბოები, რომლებიც რუსეთში იყო დალუქული და აღმოაჩინეს, რომ ხუთ კუბოში გარდაცვლილების გვამებთან ერთად სხვების ნაწილებიც იყო, ხოლო ორ შემთხვევაში ნაშთები არასწორად იყო მოთავსებული.