27 ნოემბერს სოჭში გამართულ ISU-ს გრან პრიზე მორის ყვითელაშვილი საუკეთესო მოციგურავედ დასახელდა და ოქროს მედალი მოიპოვა.

ფიგურულ სრიალში ეს საქართველოს ისტორიული გამარჯვებაა: პირველად მოიპოვა ქართველმა სპორტსმენმა ასეთი მნიშვნელობის ჯილდო.

"ამ რანგის ტურნირზე მოპოვებული ოქროს მედალი, რომელშიც მონაწილეობდა 8 ქვეყნის რეიტინგული 12 მონაწილე, პირველი შემთხვევაა საქართველოს ფიგურული ციგურაობის ისტორიაში", — ვკითხულობთ საქართველოს ფიგურული სრიალის ფედერაციის მიერ გავრცელებულ განცხადებაში.

ორდღიანი ასპარეზობის შემდეგ ყვითელაშვილმა მოკლე და თავისუფალ პროგრამაში 266,33 ქულის დაგროვება მოახერხა და პირველი ადგილი დაიკავა კაცთა კატეგორიაში. მეორე ადგილზე რუსი მოციგურავე მიხაილ კოლაიდა გავიდა, რომელმაც 264,19 ქულა მიიღო, ხოლო მესამე ადგილი იაპონელმა კაზუკი ტომონომ მოიპოვა 264,19 ქულით.

აღსანიშნავია, რომ ამავე ტურნირში მონაწილეობდა კიდევ ერთი ქართველი მოციგურავე ნიკა ეგაძე, რომელიც დებიუტანტი იყო და მე-11 ადგილი დაიკავა რეიტინგში, რაც პირველი ცდისთვის საკმაოდ კარგი შედეგია.

2020 წელს მორის ყვითელაშვილმა კიდევ ერთი ისტორიული გამარჯვება მოიპოვა: საქართველოს ფიგურული ციგურაობის ისტორიაში ის პირველი სპორტსმენი გახდა, რომელიც კაცებს შორის ევროპის ჩემპიონატზე საპრიზო ადგილზე გავიდა.