სახელმწიფო კომპანიის, საქართველოს ნავთობისა და გაზის კორპორაციის გენერალური დირექტორის, დავით თვალაბეიშვილის ხელფასი 2016 წელს 212 500 ლარი იყო. ამის შესახებ თვალაბეიშვილმა 2017 წლის 30 მარტს შევსებულ დეკლარაციაში მიუთითა.

დეკლარაციის მიხედვით, მას ჰყავს ცოლი და ორი შვილი. ნავთობისა და გაზის კორპორაციის დირექტორის ცოლის, თამარ დოლიძის შემოსავალი გასულ წელს 38 545 ლარი იყო, ამ თანხიდან 14 287 ლარი სამეწარმეო საქმიანობიდან მიღებული შემოსავალი იყო, დარჩენილი - 24 258 ლარი კი, სხვადასხვა სამსახურში გამომუშავებული თანხა. დეკლარაციის შევსების მომენტისთვის, დავით თვალაბეიშვილის 15 738 ლარი და 55 800 დოლარი ერიცხებოდა, მის ცოლს კი - 5 700 ლარი.

რაც შეეხება ოჯახის ქონებრივ დეკლარაციას, ნავთობისა და გაზის კორპორაციის გენერალურ დირექტორის სახელზეა რეგისტრირებული თბილისში 2014 წელს 116 ათას დოლარად ნაყიდი ბინა, მისი ცოლის სახელზე კი 10 ათას დოლარად 2011 წელს შეძენილი მიწის ნაკვეთი ტაბახმელაში და 2005 წელს 25 ათას დოლარად თბილისში ნაყიდი არასაცხოვრებელი ფართი. თამარ დოლიძის სახელზეა ორი ავტომობილი, რომლებშიც ყიდვის დროს გადახდილი თანხის ჯამი 109 ათასი ლარია გადახდილი.

დეკლარაციის მიხედვით, 2016 წელს, დავით თვალაბეიშილის ხარჯი 36 915 ლარი იყო. ამ თანხიდან 200 ლარი 2014 წელს ამერიკან ექსპრესიდან მიღებული 10 ათასი ლარის ხარჯია, დანარჩენი თანხა კი სწავლის გადასახადი, ნივთების შეძენასთან დაკავშირებული ხარჯები და ქონების გადასახადი.

საქართველოს ნავთობისა და გაზის კორპორაცია 2006 წლის მარტში საქართველოს ეკონომიკური განვითარების მინისტრის ბრძანებით დაფუძნდა. ამჟამად, კორპორაციის აქციათა 100 პროცენტი სს საპარტნიორო ფონდს ეკუთვნის. საპარტნიორო ფონდი კი სახელმწიფოს საკუთრებაა.