მსოფლიოს უმდიდრესი ძაღლი მალე კიდევ უფრო გამდიდრდება. გერმანული ნაგაზი, მეფური სახელით გიუნთერ VI, მაიამიში სახლს ფლობს, რომელიც ოდესღაც მადონასაც ეკუთვნოდა. კერძო ბინა, რომელშიც ცხრა საძინებელი და რვანახევარი სააბაზანოა, გიუნთერს მემკვიდრეობით ებოძა გერმანელი გრაფინია კარლოტა ლაიბენშტაინისგან, რომელიც 1992 წელს გარდაიცვალა. გრაფინია კარლოტამ მთელი თავისი $80-მილიონიანი ქონება საყვარელ ძაღლს, გიუნთერ III-ს დაუტოვა, რომელიც გიუნთერ VI-ის დიდი ბაბუაა.

ადამიანებმა, რომლებიც ძაღლის ქონებას განკარგავენ, გიუნთერის ფულის დაბანდება მთელ მსოფლიოში ვილებსა და სახლებში გადაწყვიტეს. როცა მაიამიში მდებარე სახლის გაყიდვაზე მიდგა საქმე, გიუნთერმა მინდობილობა უძრავი ქონების აგენტ რუთი ასულინს მიანიჭა, რომელიც თავიდან ვერაფრით იჯერებდა, როცა უთხრეს, ძაღლის ქონებას ვყიდითო.

საინტერესოა, როგორ მორიგდნენ აგენტი და მილიონერი ძაღლი. რუთი იხსენებს, რომ დამადასტურებელი ყეფის მიღებამდე, მას დაყნოსვის ტესტის გავლა მოუწია.

"გიუნთერთან პირველი შეხვედრისას იგი ჩემკენ გამოექანა და გულუხვად ამლოკა", — ჰყვება რუთი, — "მგონი, ასე მოვრიგდით".

მაიამის სახლს გიუნთერი აქამდეც იშვიათად სტუმრობდა — ის უმეტესად იტალიაში ცხოვრობს. ამის მიუხედავად, უზარმაზარ ბინაში დროის გატარება მაინც მოსწონდა, განსაკუთრებით კი, მადონას ყოფილ საძინებელში ამჯობინებდა ნებივრობას.

ფოტო: LPG / The Assouline Team at Compass

ძაღლის ქონებას გიუნთერის კორპორაცია განკარგავს, რომელიც საგანგებოდ შეიქმნა ცხოველზე ზრუნვისათვის. გიუნთერ VI-ს სახლი, ბაბუისგან, გიუნთერ IV-ისგან ერგო მემკვიდრეობით. ამ უკანასკნელმა ბინა მადონასგან შეიძინა 20 წლის წინ. გიუნთერ IV-ის სურათი კი სახლში, ბუხრის თავზე, დღემდე კიდია.

სხვათა შორის, გიუნთერის ქონება საქველმოქმედო საქმიანობასაც ხმარდება. მისი წარმომადგენლების გადაწყვეტილებით, მიუსაფარი ცხოველების დასახმარებლად ფონდი Gunther Rescue დაარსდა.