სახელმწიფო უსაფრთხოებისა და კრიზისების მართვის საბჭოს მდივანმა, მინდია ჯანელიძემ 2016 წელს 94 500 ლარი გამოიმუშავა, რაც თვეში საშუალოდ რვა ათასი ლარია. ხელფასის შესახებ ჯანელიძემ თანამდებობის პირის დეკლარაციაში მიუთითა, რომელიც მიმდინარე წლის 29 მარტს შეავსო.

დეკლარაციის მიხედვით, კრიზისების მართვის საბჭოს ხელმძღვანელს ჰყავს ცოლი და სამი შვილი. გასულ წელს მისი ცოლმა, ეკატერინე ჯანელიძემ თითქმის ორჯერ მეტი (171 250 ლარი) გამოიმუშავა.

რაც შეეხება ჯანელიძეების ოჯახის სხვა ფინანსურ მდგომარეობას. დეკლარაციის შევსების მომენტისთვის, ცოლ-ქმარს სახელფასო ანგარიშზე ჯამში 14 900 ლარი ჰქონდათ. გასულ წელს მინდია ჯანელიძემ 50 ათასი დოლარი, ხოლოდ ეკატერინე ჯანელიძემ 90 ათასი ლარის მოცულობის სესხი აიღეს.

მინდია ჯანელიძის სახელზეა რეგისტრირებული ორი საცხოვრებელი სახლი და ავტოფარეხი თბილისში. მან ამ ქონების ღირებულებად ჯამში 84 ათასი ამერიკული დოლარი მიუთითა. კრიზისების მართვის საბჭოს ხელმძღვანელის ცოლს, ეკატერინე ჯანელიძეს კი, 57 ათასი ამერიკული დოლარის ღირებულების კომერციული ფართი აქვს. მის სახელზევეა რეგისტრირებული 2016 წელს ნაყიდი BMW X4, რომელის ღირებულებაც 41 ათასი ევროა.

ჯანელიძე კრიზისების მართვის საბჭოს მდივნად 2015 წლის მაისიდან მუშაობს, მანამდე ის თავდაცვის მინისტრის თანამდებობას იკავებდა. კრიზისების მართვის საბჭოში ჯანელიძემ 2015 წელს 55 ათასი ლარის ოდენობის ანაზღაურება მიიღო.