ელისეს სასახლის თავზე აღმართული დროშის ფერის ცვლილება, როგორც ჩანს, ერთი წელია, ვერავინ შეამჩნია, რადგან ინტერნეტსივრცეში ამ ამბავზე მხოლოდ ბოლო დღეებში ალაპარაკდნენ. მაკრონის ადმინისტრაციამ საფრანგეთის დროშაზე ლურჯი ფერი გაამუქა და ამით მას რევოლუციისდროინდელი იერი დაუბრუნა.

ადმინისტრაციის ცნობით, დროშაზე ფერი გასული წლის ივლისში შეიცვალა, თუმცა ეს აქამდე ცოტამ თუ შენიშნა.

ფოტო: Reuters

მუქი ლურჯი ფერი საფრანგეთის დროშაზე მე-18 საუკუნიდან იყო, როცა ეს ალამი რევოლუციის სიმბოლოდ იქცა. მოგვიანებით, 1970-იან წლებში ლურჯი ფერის გაღიავება გადაწყდა.

ოფიციალური წყაროების ცნობით, მუქი ლურჯი "უფრო მომხიბვლელია" და "საფრანგეთის რევოლუციას სიმბოლურად უკავშირდება". თუმცა, ზოგიერთი ფიქრობს, რომ ლურჯის გამუქება ევროკავშირის დროშაზე გამოყენებულ ფერთან გასამიჯნად გადაწყდა, რაც, შესაძლოა, საფრანგეთსა და ევროპას შორის გაჩენილ ბზარზე მიანიშნებდეს. თავის დროზე საფრანგეთის სიმბოლოზე ლურჯის გაღიავება სწორედ ევროკავშირის დროშასთან შეხამებას უკავშირდებოდა, თუმცა, ამჯერად "ბზარის სიმბოლოს" ვერსიას პრეზიდენტის ადმინისტრაციაში უარყოფენ და მას "სისულელეს" უწოდებენ.

ადგილობრივი კორესპონდენტის ცნობით, დროშაზე ფერის ცვლილებას არაერთგვაროვანი რეაქცია მოჰყვა საზოგადოებაში. ზოგს ახალი დროშა უშნოდ მიაჩნია და მას ნამდვილად ევროკავშირთან უთანხმოების სიმბოლოდ მიიჩნევს, ზოგს კი მუქი ლურჯი ბავშვობას ახსენებს.