ევროკავშირის ელჩი საქართველოში, კარლ ჰარცელი მიხეილ სააკაშვილის მდგომარეობაზე ომბუდსმენის მიერ კონსილიუმის შექმნას მიესალმება. ამის შესახებ განცხადებას საქართველოში ევროკავშირის წარმომადგენლობა ავრცელებს.

"ევროკავშირის ელჩი კარლ ჰარცელი დღეს სახალხო დამცველს შეხვდა.
ელჩი მიესალმა სახალხო დამცველის და მისი გუნდის მიერ მიხეილ სააკაშვილის ჯანმრთელობის მდგომარეობის ობიექტურად შესაფასებლად შექმნილ დამატებით სამედიცინო ექსპერტიზას, რადგან საქართველოში ადამიანის უფლებების დაცვის მეთვალყურეობა სწორედ სახალხო დამცველისთვის კონსტიტუციით მინიჭებული უმნიშვნელოვანესი მანდატის ნაწილია", — აღნიშნულია განცხადებაში.

ხელისუფლების კრიტიკის შემდეგ ომბუდსმენს აშშ-ის ელჩი საქართველოში კელი დეგნანი და ევროპარლამენტარები გამოექომაგნენ, რომლებმაც აღნიშნეს, რომ სახალხო დამცველის ინსტიტუტი კრიტიკას ნაცვლად, ქებას იმსახურებს.


ექსპრეზიდენტის სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი 17 ნოემბერს წარადგინა. ჯგუფის მიზანია შეაფასოს რამდენად შეესაბამება ექსპრეზიდენტის ჯანმრთელობის უფლების დაცვას N18 სამკურნალო დაწესებულება ამჟამად და იქნება თუ არა ამ დაწესებულებაში ადეკვატური სამედიცინო სერვისის მიწოდება შესაძლებელი პატიმრის მიერ ხანგრძლივი შიმშილობის შეწყვეტის შემდეგ, როგორც ამას ადამიანის უფლებათა ევროპული სასამართლო 10 ნოემბრის გადაწყვეტილებით ითხოვს.

სახალხო დამცველის მიერ შემქნილი ექიმთა კონსილიუმის წევრი არიან:

  • გიორგი გრიგოლია — ანესთეზიოლოგ-რეანიმატოლოგი;
  • გრიგოლი ხურციძე — შინაგანი სნეულებები/ჰოსპიტალური მედიცინა;
  • გიორგი კაჭარავა — კარდიოლოგი;
  • გიორგი პაპიაშვილი — კარდიოლოგი/არითმიოლოგი;
  • აიდა გოზალოვა — ჰემატოლოგი, კლინიკური ონკოლოგი, ინტერნისტი, პალიატიური მედიცინის სპეციალისტი;
  • მამუკა მაჩაიძე — ინფექციონისტი, თერაპევტი;
  • თენგო წულაძე — ნევროლოგი;
  • ნინო ზავრაშვილი — ენდოკრინოლოგი