ქართული ოცნების დეპუტატი, ირაკლი ქადაგიშვილი აცხადებს, რომ საქართველო ყველას "ფეხების შესაწმენდი" არ არის და უკრაინის ომბუდსმენმაც და დეპუტატმაც ქვეყნის სუვერენიტეტს პატივი უნდა სცეს. ასე ეხმაურება ის მიხეილ სააკაშვილთან ლუდმილა დენისოვას არშეშვებას.

"ის, რომ სააკაშვილი არ სცემს პატივს იმ ქვეყანას, რომლის პრეზიდენტიც იყო ერთ დროს, არ უნდა გახდეს წესი და რიგი. საქართველო არ არის ყველას ფეხების შესაწმენდი ქვეყანა. უკრაინის დეპუტატი იქნება თუ სახალხო დამცველი იქნება, კეთილი უნდა ინებოს და პატივი სცეს ჩვენი ქვეყნის სუვენერიტეტს და პოლიტიკური მიზნებისთვის ჩვენი ქვეყნის შიდა მდგომარეობა არავის უნდა გამოვაყენებინოთ. ამიტომ, მან უნდა მიმართოს სახელმწიფოსაც და შესაბამისი პროცედურები გაიაროს, შესაბამისი პატივისცემა უნდა გამოხატოს საქართველოს სახელმწიფოს მიმართ. აქ არ არის ლაპარაკი არც ირაკლი ქადაგიშვილზე და არც იუსტიციის მინისტრის სახელს და გვარზე. აქ არის საქართველოს სახელმწიფოზე ლაპარაკი. უნდა კეთილი ინებოს ყველამ და ამ სახელმწიფოსთან ითანამშრომლონ და იასუბრონ, ისე, როგორც სუვენერულ სახელმწიფოსთან არის ეს მიღებული", — აცხადებს ქადაგიშვილი.

უკრაინის სახალხო დამცველი, ლუდმილა დენისოვა უკრაინის მოქალაქისა და საქართველოს ექსპრეზიდენტ მიხეილ სააკაშვილის სანახავად ციხეში არ შეუშვეს. ამ თემაზე დასმული კითხვის პასუხად, იუსტიციის მინისტრი რატი ბრეგაძე აცხადებს, რომ გლდანის #18 დაწესებულება სამკურნალოა და თავს იკავებენ იქ შეუშვან ის ადამიანები, ვისაც საქართველოს კანონმდებლობით ამის უფლება არ აქვს.