პენიტენციური სამსახურის მტკიცებით, კომპიუტერული ტომოგრაფი, რომელიც გლდანის პენიტენციურ დაწესებულებაში მიხეილ სააკაშვილის გადაყვანის შემდეგ შეიტანეს, დამონტაჟებულია და მუშა მდგომარეობაშია. ამის შესახებ ექიმი პენიტენციური სამსახურის მიერ გავრცელებულ ვიდეოში, გათიშული ტომოგრაფის ფონზე ლაპარაკობს.

"ეს არის ის CT აპარატი, რომელზეც ყველაზე მეტი სპეკულაცია ხდებოდა. როგორც ხედავთ კომპიუტერული ტომოგრაფიის აპარატი არის დამონტაჟებული, ის არის მუშა მდგომარეობაში და საჭიროების შემთხვევაში, შესაძლებელია მისი გამოყენება, შესაბამისად, სპეკულაციების ადგილი აღარ რჩება", — განაცხადა ექიმმა.

ამავე ვიდეოში, ის კამერასთან ერთად მოძრაობის სამედიცინო დაწესებულების რეანიმაციულ განყოფილებაში და აჩვენებს სხვადასხვა მოწყობილობას იმის დასამტკიცებლად, რომ სააკაშვილის სამკურნალოდ საჭირო აპარატურა აქვთ. მისი თქმით, ეს აპარატურა საკმარისია, როგორც მოშიმშილე პატიმრის, ასევე, შიმშილობის შეწყვეტის შემდგომი მართვისთვის.

მისივე თქმით, კლინიკაში არის: სასუნთქი აპარატი, მულტიფუნქციური საწოლი, იუფუზომატი და ლინეომატი, შოკის მაგიდა, პორტატული ექოსკოპიის აპარატი, დეფიბრილატორი, ელექტროსაქაჩი, კარდიომონიტორი და ოქსიგენაციის აპარატი და ელექტროკარდიოგრაფიის აპარატი.

სამინისტროს მტკიცებით, კლინიკაში ფუნქციონირებს საოპერაციო ბლოკი, რომელიც დაკომპლექტებულია ყველა საჭირო ტექნიკით, მათ შორის, საანესთეზიო აპარატით, კარდიომონიტორით, ხელოვნური სუნთქვის აპარატით და სხვ. მათივე მტკიცებით, ფუნქციონირებს ჰემოდიალიზის აპარატი და იქვე შესაძლებელია ჩატარდეს ეზოფაგოგასტროდუოდენოსკოპია, სპირომეტრია, ულტრასონოგრაფიული გამოკვლევა.

სამედიცინო სფეროს არაერთმა წარმომადგენელმა და პოლიტიკოსმა განაცხადა, რომ გლდანის ციხის სამკურნალო დაწესებულება არ არის მრავალპროფილური და ვერ აკმაყოფილებს იმ სტანდარტებს, რაც მიხეილ სააკაშვილის სამკურნალოდ არის საჭირო. სწორედ ამიტომ ისინი სააკაშვილის პოლიპროფილურ სამოქალაქო კლინიკაში გადაყვანას მოითხოვდნენ.

რაც შეეხება კომპიუტერულ ტომოგრაფს, ის 8 ნოემბერს გლდანის პენიტენციური დაწესებულების კლინიკაში სააკაშვილის გადაყვანის შემდეგ შეიტანეს, რასაც ასევე კრიტიკა მოყვა. რამდენიმე ვიზიტის შემდეგ სააკაშვილის პირადი ექიმი და პოლიტიკოსები ამბობდნენ, რო ტომოგრაფი დერეფანში იდგა და შტეფცელშიც კი არ იყო შეერთებული.