ბათუმში, რურუას #1ა-ში ხუთსართულიანი კორპუსის კედლიდან ბათქაში ჩამოიშალა. შემთხვევის შედეგად არავინ დაშავებულა. ბათუმის მერიაში On.ge-ს განუცხადეს, რომ უსაფრთხოების მიზნით, 72 ოჯახს ალტერნატიულ ფართში გადაიყვანენ. მათივე თქმით, კორპუსის ბინადრების ევაკუაციის პროცესი უკვე დაიწყო, თუმცა მათი ნაწილი სასტუმროში გადასვლაზე უარს აცხადებს.

"ჩვენ მხარეს ბზარი აქვს კედელს. წინ უკვე დიდი ხანია ჩამოიშალა. 20 დღის წინ იყვნენ მერიაში მისულნი, განაცხადი გააკეთეს, მაგრამ არანაირი პასუხი არ გვაქვს ჯერჯერობით. რამდენი დიდი მანქანა ჩაივლის, სულ ინგრევა", — ამბობს რურუას ქუჩის ერთ-ერთი მცხოვრები ბათუმელებთან.

ადგილობრივების თქმით, კორპუსი ძველია და შეფასებულია, როგორც ავარიული სახლი.

ბათუმის მერის მოვალეობის შემსრულებელი, ლელა სურმანიძე აცხადებს, რომ ექსპერტიზის შედეგების მიხედვით გადაწყდება კორპუსის ბინადრები ქირით რამდენ ხანს დარჩებიან. ექსპერტიზის პასუხი დაადგენს, ასევე, კორპუსის გამაგრებითი სამუშაოები ჩატარდება თუ დემონტაჟი გახდება საჭირო.

"კორპუსის ერთ კედელზე ბათქაშის ცვენა დაფიქსირდა. მოსახლეობა შეშინებულია. ჩვენ მათ ვთავაზობთ უსაფრთხო ადგილას გაყვანას. ახლა ყველა ოჯახი იქნება გადაყვანილი სასტუმროში. ჩატარდება კვლევა, ანუ კორპსუსის მდგომარეობის შეფასება და შემდგომ დაიგეგმება უკვე, რა ღონისძიებები უნდა გატარდეს", — ამბობს სურმანიძე.

რაც შეეხება კორპუსის ავარიულ სტატუსს, ლელა სურმანიძის თქმით, ამაზე დეტალური კვლევა ჩატარებული არ არის.