ესტონეთის ყოფილი პრეზიდენტი ტომას ჰენდრიკ ილვესი აცხადებს, რომ საქართველო ცენტრალური აზიის დესპოტების გავლილ გზას დაადგა. ასე ეხმაურება ის ექსპრეზიდენტ მიხეილ სააკაშვილის ციხეში იძულებით გადაყვანის კადრებსა და პოლიტიკოსებისა და აქტივისტების დაკავებას.

"მსგავსი ინციდენტებით და პრეზიდენტ სააკაშვილის შეურაცხყოფის შემზარავი კადრებით საქართველო ცენტრალური აზიის დესპოტების გავლილ გზას დაადგა. მათ არც დასავლური და ევროპული ნორმები აინტერესებთ და არც ქართული, როგორც ჩანს. საქართველოს არჩევანია, რა თქმა უნდა", — წერს ილვესი.

მისივე განცხადებით, საქართველოში ევროკავშირის წარმომადგენლობის აუცილებლობას ვერ ხედავს და სვამს კითხვას, რატომ უნდა დახარჯოს მისმა და სხვა ქვეყანებმა ფული აქ საელჩოებში.

ბოლო პერიოდში არაერთმა უცხოელმა პოლიტიკოსმა და პარტნიორმა გააკრიტიკა საქართველოს ხელისუფლება ქვეყანაში მიმდინარე მოვლენების გამო. კერძოდ, ისინი ექსპრეზიდენტ მიხეილ სააკაშვილის უფლებების დარღვევაზე მიუთითებენ.