შპს საქართველოს ლატარიის კომპანიის დირექტორმა, ლევან ჩიკვაიძემ, რომელიც ასევე არის შპს საქართველოს ფოსტისა და შპს ექსპრესის დირექტორი, 2016 წელს 178 747 ლარი გამოიმუშავა. სამივე კომპანიაში ის 2012 წლის საპარლამენტო არჩევნების შემდეგ დაინიშნა და სამივე კომპანიის წილებს სახელმწიფო ფლობს. ჩიკვაიძემ საკუთარი ხელფასის შესახებ 28 მარტს შევსებულ დეკლარაციაში მიუთითა.

დეკლარაციის მიხედვით, ჩიკვაიძის ხელფასი შპს საქართველოს ლატარიის კომპანიაში 104 315 ლარი იყო, შპს საქართველოს ფოსტაში - 38 719 ლარი, შედარებით ნაკლები კი - შპს ექსპრესში - 35 713 ლარი.

თანამდებობის პირის დეკლარაციის მიხედვით, ლევან ჩიკვაიძეს ჰყავს ცოლი და ორი შვილი. ჩიკვაიძეც და მისი ცოლიც ფლობენ თითო-თითო ბინას თბილისში. ლატარიის კომპანიის დირექტორს ეკუთვნის Hyundai-ის მარკის ავტომობილი.

რაც შეეხება მისი ოჯახის სხვა ფინანსურ მონაცემებს. დეკლარაციის შევსების მომენტისთვის, მის ანგარიშზე ირიცხებოდა 3 986 ლარი, მის ცოლს კი - 223 ლარი. ბანკში დასაფარი თანხა ჩიკვაიძეს - 16 872 ლარი და 1 750 ამერიკული დოლარი ჰქონდა. დეკლარაციითვე ირკვევა, რომ მის ორივე შვილს ბებიამ ჯამში 10 ათასი ამერიკული დოლარი აჩუქა.