დროას ლიდერი, ელენე ხოშტარია აცხადებს, რომ შიმშილობას არ შეწყვეტს, სანამ მიხეილ სააკაშვილს სამოქალაქო კლინიკაში არ გადაიყვანენ. მან მადლობა გადაუხადა სააკაშვილს შეფასებისა და შიმშილობის შეწყვეტის მოწოდებისთვის, თუმცა აღნიშნა, რომ გადაწყვეტიელბა არავის მითითებით არ მიუღია და კონკრეტული მოთხოვნა ჰქონდა, რომლის შესრულებასაც დაელოდება.

"დღეს კიდევ ერთხელ, ძალიან კონკრეტული გარემოებებით, სტრასბურგის მოთხოვნით და სააკაშვილის კომპრომისით, ქართული ოცნების ხელშია ამ კრიზისის განმუხტვის საბოლოო გასაღები. დღესვე შეუძლია მიიღოს გადაწყვეტილება სტრასბურგის პოზიციის შესაბამისად. სანამ სააკაშვილი არ იქნება გადაყვანილი სამოქალაქო-მულტიფუნქციურ კლინიკაში, მე, რა თქმა უნდა შიმშილობას არ ვწყვეტ", — განაცხადა მან.

დღეს ექსპრეზიდენტმა, მიხეილ სააკაშვილიმა ელენე ხოშტარიას მოუწოდა, რომ შიმშილობა შეეწყვიტა. თავად სააკაშვილი კი აცხადებს, რომ ითვალისწინებს სტრასბურგის სასამართლოსა და დასავლელი პარტნიორების მოწოდებას და როგორც კი გადაიყვანენ სათანადო დაწესებულებაში, შიმშილობას შეწყვეტს.

ხოშტარიამ შიმშილობა 3 ნოემბერს, პარლამენტში დაიწყო და თავიდანვე თქვა, რომ იქამდე არ შეწყვეტდა მანამ, სანამ სააკაშვილს სამოქალაქო კლინიკაში არ გადაიყვანდნენ.

ამ 8 დღის განმავლობაში ხოშტარია ქართული ოცნებიდან მხოლოდ პარლამენტის თავმჯდომარემ, კახა კუჭავამ და დეპუტატმა სოზარ სუბარმა მოინახულა. პარტიის თავმჯდომარე კი ფიქრობდა, რომ "ვიღაც ხოშტარიას" შიმშილობა იმისთვის, რომ მესამე პრეზიდენტმა, მიხეილ სააკაშვილმა არ იშიმშილოს, "სრული ნონსესი" და "კომიკური ჟანრის გაგრძელება" იყო.

შიმშილობის მე-8 დღეს ხოშტარიას რამდენიმე ანალიზში ცვლილებები იყო და საჭირო გახდა სამედიცინო ჩარევა, ამიტომ ის იღებს მედიკამენტებს და გადასხმას. თუმცა, კვლავ უარს ამბობს საკვები დანამატებისა და კალორიების მიღებაზე.