ქართული ოცნების დეპუტატი, გურამ მაჭარაშვილი ბადრაგების მიერ ექსპრეზიდენტის გლდანის #18 სამედიცინო დაწესებულებაში ძალის გამოყენებით შეყვანას ხსნის იმით, რომ ექსპრეზიდენტმა ნებაყოფლობით შესვლაზე უარი განაცხადა. მისი აზრით, ბადრაგს "მოუწია", რომ ის მანქანიდან იძულებით გადაეყვანა.

"პატიმარი სააკაშვილი გადაყვანილი იქნა სამედიცინო დაწესებულებაში, სადაც სამწუხაროდ, მან უარი განაცხადა შესვლაზე და სამწუხაროდ, ბადრაგს მოუწია რომ ის გადაეყვანა იძულებით, მისი ჯანმრთელობის მდგომარეობის სტაბილურობის გამო. მეორე რამ დაინახა საზოგადოებამ, რომ 40 დღეზე მეტხანს მოშიმშილე ადამიანი, როგორ აყენებს ბადრაგს ფიზიკურ შეურაცხყოფას", — თქვა მან.

პენიტენციურმა სამსახურმა გამოაქვეყნა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

მისდამი ასეთ მოპყრობაზე სააკაშვილმა იმ დღესვე ისაუბრა, როცა გლდანის ციხეში გადაიყვანეს. ის აცხადებდა, რომ წინააღმდეგობის მიუხედავად, იძულებით შეიყვანეს მე-18 დაწესებულებაში, კრიმინალების გინების ქვეშ გაათრიეს მიწაზე, ჩაარტყეს კისერში, ათრიეს თმებით, რა დროსაც წინააღმდეგობა გაუწია. მისი ადვოკატი, ნიკა გვარამია კი ამბობდა, რომ პატიმრები, ე.წ. შუმოკით ფანჯრებთან სპეციალურად დაახვედრეს და სააკაშვილი აგინებინეს.

ექსპრეზიდენტის იძულებით შეყვანის ვიდეოს გავრცელებამდე იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.