ქართული ოცნების დეპუტატი ნინო წილოსანი ამბობს, რიმ სახელმწიფო სისტემა და კონკრეტულად, პენიტენციური სამსახური ყოფილ პრეზიდენტ მიხეილ სააკაშვილს "ყველა კანონის და უფლების დაცვით" ექცევა.

წილოსანის აზრით, არავინ არ დაუშვებს, რომ მან "იძალადოს" პენიტენციური სისტემის თანამშრომლებზე. მისივე შეფასებით, სააკაშვილი რჩება ისეთი, როგორიც იყო და პატივს არ სცემს არცერთ უწყებას.

"ამ კადრების გავრცელება მიზნად ისახავდა საზოგადოების ინფორმირებას. იმიტომ, რომ ვხვდებით, რამდენად დიდია ინტერესი ამ საკითხთან დაკავშირებით. [...]

სახელმწიფო სისტემა, ისევე, როგორც პენიტენციური კონკრეტულად მიხეილ სააკაშვილს ექცევა ყველა კანონის და მისი უფლების დაცვით", — ამბობს წილოსანი.

პენიტენიცურმა სამსახურმა გაავრცელა კადრები, სადაც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ.

თავდაპირველად, ვიდეოში ჩანს, რომ ექსპრეზიდენტი ათამდე ბადრაგმა სასწრაფო დახმარების მანქანიდან იძულებით, მისი სურვილის წინააღმდეგ გადმოიყვანა, შენობაში და შემდეგ ლიფტში, ასევე, ძალის გამოყენებით, ხელში აყვანილი შეიყვანა, რა დროსაც მას ტანსაცმელი თითქმის გახდილი აქვს.

ექსპრეზიდენტი ციხის საავადმყოფოს პალატაში უკვე წელზევით შიშველი შეჰყავთ და პირდაპირ იატაკზე სვამენ. ვიდეოს არ აქვს ხმა, თუმცა ჩანს, რომ უკვე პალატაში სააკაშვილი ჩხუბობს და სამედიცინო ხელსაწყოს იატაკზე აგდებს. სიტყვიერი დაპირისპირების დროს, კადრებში ჩანს, რომ სააკაშვილი პალატაში მყოფი პირისკენ გაიწია, თუმცა ხელი არ დაურტყამს.

მისდამი ასეთ მოპყრობაზე სააკაშვილმა იმ დღესვე ისაუბრა, როდესაც გლდანის ციხეში გადაიყვანეს. გავრცელებულ წერილში ის იქ შეყვანის დეტალებს აღწერს. სააკაშვილის თქმით, მისი წინააღმდეგობის მიუხედავად, იძულებით შეიყვანეს გლდანის მე-18 დაწესებულებაში, კრიმინალების გინების ქვეშ გაათრიეს მიწაზე, ჩაარტყეს კისერში, ათრიეს თმებით, რა დროსაც წინააღმდეგობა გაუწია.