105 წლის ამერიკელმა ქალმა, მეტსახელად "ქარიშხალმა", 100-მეტრიან დისტანციაზე სირბილში მსოფლიო რეკორდი დაამყარა — შესაბამისი მანძილი მან 1 წუთში, 2 წამსა და წამის 95 მეასედში დაფარა. ჯულია ჰოუკინსი მიღწეული შედეგით პირველი ქალი და პირველი ამერიკელი მძლეოსანი გახდა, რომელმაც სპორტის ამ სახეობაში, 105 წლის ან უფროსი სპორტსმენების კატეგორიაში, მსოფლიო რეკორდის დამყარება შეძლო.

სანამ ჯულია რეკორდს ამყარებდა, გარშემო მას მეგობრები და ოჯახის წევრები ამხნევებდნენ.

"შესანიშნავი იყო ამდენი მეგობრისა და ახლობლის ხილვა", — განაცხადა მოგვიანებით ჰოუკინსმა, —"თუმცა, წუთზე ნაკლებ დროში მინდოდა ამის მიღწევა".

თავისი შედეგით უკმაყოფილო მძლეოსანს ჰკითხეს, კიდევ თუ ირბენდა 100-მეტრიან დისტანციაზე, რაზეც დაუფიქრებლად გასცა დადებითი პასუხი.

თუმცა, ეს პირველი შემთხვევა არაა, როცა ჰოუკინსი მედიის ყურადღების ცენტრში მოექცა. ლუიზიანელმა ქალმა, რომელიც წინათ სკოლის მასწავლებელი იყო, 101 წლის ასაკში 100-მეტრიანი დისტანცია 40,12 წამში დაფარა.

"სირბილი მიყვარს და მომწონს, რომ სხვებისთვის მოტივაცია ვარ", — ამბობს ჰოუკინსი, — "მინდა, იქამდე ვირბინო, ვიდრე ამას შევძლებ. სხვებს კი ვეტყოდი, რომ თუკი გინდათ, ასაკის მატებასთან ერთად ისევ ჯანმრთელი და ბედნიერი იყოთ, აქტიურად უნდა იცხოვროთ".

2019 წელს ჰოუკინსმა ოქროს ორი მედალიც მოიპოვა ნიუ-მექსიკოში გამართულ შეჯიბრზე, 50-მეტრიან და 100-მეტრიან დისტანციაზე სირბილში.

"მიხარია, რომ ისე კარგად ვიასპარეზე, როგორც მოვახერხე, თუმცა, ისე კარგად ნამდვილად ვერ მოვახერხე, როგორც აქამდე მიასპარეზია", — დასძენს ჯულია, — "არ ვიცი, ეს იმის გამოა, რომ მოვხუცდი თუ ყველაფერი გარემოს დავაბრალო.

"წარმოიდგინე, რომ ამ ასაკში ასეთი რაღაცის გაკეთება ისევ შეგიძლია", — განაგრძობს იგი, — "უბრალოდ, ვცდილობ, სულ დაკავებული ვიყო. ვმოძრაობ. საერთოდ არ ვვარჯიშობ, მიუხედავად იმისა, რომ წინათ ვვარჯიშობდი, თუმცა, ახლა ვფიქრობ, რომ აღარ მჭირდება".

დასასრულს ჰოუკინსმა განაცხადა, რომ მომავალი წლის მაისში, ფლორიდაში, სიამოვნებით იასპარეზებდა შეჯიბრებაზე.