სახელმწიფო ინსპექტორის სამსახური პენიტენიცურ სამსახურსა და იუსტიციის სამინისტროს მოუწოდებს, რომ მიხეილ სააკაშვილის პერსონალური მონაცემების შემცველი ვიდეო ჩანაწერების გასაჯაროება შეწყვიტონ, ამასთან, პატივი სცენ ადამიანის ღირსებასა და პირადი ცხოვრების ხელშეუხებლობას. ინსპექტორის სამსახურმა სააკაშვილის გლდანის ციხეში გადაყვანის კადრების გასაჯაროების კანონიერების შესწავლა დაიწყო.

ინსპექტორის სამსახური მათ, ასევე, მოუწოდებს, რომ თავი შეიკავონ სახელმწიფო ინსპექტორის წარმოებაში არსებული სისხლის სამართლის საქმის შეფასებისაგან, ვინაიდან მიხეილ სააკაშვილის მიმართ შესაძლო არაადამიანური მოპყრობის საქმის გამოძიება წარმოადგენს სახელმწიფო ინსპექტორის სამსახურის კომპეტენციას.

"მიუხედავად იმისა, რომ სახელმწიფო ინსპექტორის სამსახურის მიერ არაერთხელ იქნა გავრცელებული მოწოდება იმის თაობაზე, რომ ყველა უწყება და პირი სიფრთხილით უნდა მოკიდებოდა საქართველოს მესამე პრეზიდენტის პერსონალური მონაცემების გასაჯაროების საკითხს, ბოლო პერიოდში სისტემატური ხასიათი მიიღო მისი პერსონალური მონაცემების შემცველი ვიდეოჩანაწერების გავრცელებამ საჯარო ინტერესის დაკმაყოფილების მოტივით", — ვკითხულობთ განცხადებაში.

ინსპექტორის სამსახურის განცხადებით, იმ პირობებში, როცა მათ მიერ სააკაშვილის პერსონალური მონაცემების მოპოვებისა და გასაჯაროების არაერთი შემთხვევის კანონიერების შესწავლა მიმდინარეობს, რაზეც საბოლოო გადაწყვეტილებები ჯერ არ მიღებულა, კატეგორიულად მიუღებელია სპეციალური პენიტენციური სამსახურისა და საქართველოს იუსტიციის სამინისტროს მიერ ამგვარი პრაქტიკის გაგრძელება და მესამე პრეზიდენტის პერსონალური მონაცემების გასაჯაროება.

სახელმწიფო ინსპექტორის სამსახურში სააკაშვილის მიმართ განხორციელებული შესაძლო არაადამიანური მოპყრობის საქმეზე გამოძიება საქართველოს სისხლის სამართლის კოდექსის 144-ე ტერცია მუხლის მე-2 ნაწილის "ა", "ბ", "ე" და "ზ" ქვეპუნქტებით მიმდინარეობს. მათი ცნობით, მიუხედავად იმისა, რომ მათ არსებული ვიდეოჩანაწერების დაარქივება მოითხოვეს, პენიტენციურ სამსახურს ამ დრომდე არ დაუდასტურებია ასეთი ჩანაწერების არსებობის ფაქტი და შესაბამისად, არ მომხდარა სასამართლო განჩინების საფუძველზე მათი გამოთხოვა.

"სპეციალური პენიტენციური სამსახურისა და იუსტიციის სამინისტროს მხრიდან აღნიშნული კადრების გასაჯაროება (რომელიც მათ შორის, წარმოადგენს სახელმწიფო ინსპექტორის სამსახურის წარმოებაში არსებულ სისხლის სამართლის საქმეზე მტკიცებულებას), საფრთხეს უქმნის ეფექტიანი გამოძიების ჩატარებას", — აღნიშნავენ ინსპექტორის სამსახურში.

პენიტენციურმა სამსახურმა გამოაქვეყნა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

მისდამი ასეთ მოპყრობაზე სააკაშვილმა იმ დღესვე ისაუბრა, როცა გლდანის ციხეში გადაიყვანეს. ის აცხადებდა, რომ წინააღმდეგობის მიუხედავად, იძულებით შეიყვანეს მე-18 დაწესებულებაში, კრიმინალების გინების ქვეშ გაათრიეს მიწაზე, ჩაარტყეს კისერში, ათრიეს თმებით, რა დროსაც წინააღმდეგობა გაუწია. მისი ადვოკატი, ნიკა გვარამია კი ამბობდა, რომ პატიმრები, ე.წ. შუმოკით ფანჯრებთან სპეციალურად დაახვედრეს და სააკაშვილი აგინებინეს.

ექსპრეზიდენტის იძულებით შეყვანის ვიდეოს გავრცელებამდე იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.

ეს მესამე შემთხვევაა, როცა პენიტენიცურმა სამსახურმა ციხიდან სააკაშვილის კადრები გაასაჯაროვა. პირველად, 6 ნოემბერს გაავრცელეს ვიდეო, სადაც, მათი მტკიცებით, სააკაშვილი "საკვებს იღებს". აღნიშნული პენიტენციურმა "მაღალი საჯარო ინტერესით" ახსნა. პარალელურად, განცხადება გააკეთა სახალხო დამცველმა, რომელმაც მიღებულ ინფორმაციაზე დაყრდნობით თქვა, რომ სააკაშვილი პირველი ოქტომბრის შემდეგ უწყვეტად შიმშილობდა და ის, რასაც იღებდა, იყო არა საკვები, არამედ სამედიცინო დანიშნულებით გამოწერილი საკვები დანამატები და მედიკამენტები. კადრების გავრცელების შემდეგ, სააკაშვილმა შეწყვიტა აღნიშნული საკვები დანამატებისა და წამლების მიღება, უარი თქვა ტესტების ჩატარებაზეც.

8 ნოემბერს სააკაშვილი, მისი და მისი ადვოკატების სურვილის საწინააღმდეგოდ, გლდანის ციხის საავადმყოფოში გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა — მას შემდეგ, რაც რუსთავის ციხიდან აფრენილი ვერტმფრენი გლდანის ციხის თავზე გამოჩნდა. მოგვიანებით, სახალხო დამცველმა, ნინო ლომჯარიამ განაცხადა, რომ როგორც სააკაშვილს უთხრეს, ის სამოქალაქო კლინიკაში გადაჰყავდათ და მხოლოდ ამიტომ დათანხმდა შეთავაზებას. პარალელურად, პენიტენიცურმა გაავრცელა მორიგი კადრები, სადაც ჩანს, რომ სააკაშვილი ნივთებს ალაგებს. ამ კადრებზე დაყრდნობით უწყება ამტკიცებდა, რომ სააკაშვილს სასჯელაღსრულების დაწესებულება მისი ნების საწინააღმდეგოდ არ დაუტოვებია.

პატიმრის პირადი ინფორმაციის დაცვა რომ აუცილებელია, ამაზე განცხადება სახელმწიფო ინსპექტორის სამსახურმა ჯერ კიდევ 5 ნოემბერს, კადრების გავრცელებამდე გააკეთა. იქ აღნიშნული იყო, რომ მნიშვნელოვანია დაცული იყოს მოშიმშილე პატიმრის პირადი ცხოვრების ხელშეუხებლობა, მისი პერსონალური, განსაკუთრებით კი, ჯანმრთელობის მდგომარეობის შესახებ მონაცემები. მეორე დღეს, კადრების გავრცელების შემდეგ, მათ კადრების მოპოვებისა და გავრცელების კანონიერების შესწავლა დაიწყეს.