სამუშაო ადგილზე სექსუალური შევიწროების შესახებ ინფორმირებულობის ამაღლების, მისი პრევენციისა და აღმოფხვრის მიზნით გაეროს ქალთა ორგანიზაციამ საჯარო სამსახურის ბიუროსა და სახალხო დამცველის აპარატთან ერთად ელექტრონული კურსის „სექსუალური შევიწროების აღმოფხვრა სამუშაო ადგილზე“ პრეზენტაციას გამართა.

ფოტო: გაეროს ქალთა ორგანიზაცია / Jumpstart

გაეროს ქალთა ორგანიზაციის ინფორმაციით, კურსში გაერთიანებულია პრაქტიკული მასალა, რომელიც საერთაშორისო სტანდარტებს ეფუძნება. მასალაში მოცემულია პრაქტიკული რჩევები და აღწერილი შემთხვევები ქართულ კონტექსტზეა მორგებული.

"საქართველოში სამუშაო ადგილზე სექსუალური შევიწროება ტაბუდადებულ თემად მიიჩნევა და მასზე ხმამაღლა არ საუბრობენ. ბევრმა ადამიანმა არც კი იცის, რომ ის, რასაც განიცდის, სექსუალური შევიწროებაა, ამიტომ ეს პრობლემა მეტწილად გაუმჟღავნებელი რჩება," - ამბობენ ორგანიზაციაში.

მათივე განმარტებით, ელექტრონული კურსი გაეროს ქალთა ორგანიზაციამ ძირითადად საჯარო მოხელეებისთვის მოამზადა, თუმცა, გამოყენება კერძო სექტორის დამსაქმებლებსაც შეუძლიათ. კურსი სახალხო დამცველი ვებგვერდზეა განთავსებული და ნებისმიერი დაინტერესებული ადამიანისთვის ბმულზე უფასოდაა ხელმისაწვდომი.