ქართული ოცნების დეპუტატი გურამ მაჭარაშვილი ფიქრობს, რომ ამ ეტაპზე არავის აქვს საფუძველი სააკაშვილის კერძო კლინიკაში გადაყვანა მოითხოვს, რადგან მისი სასიცოცხლო პარამეტრები კითხვის ნიშნის ქვეშ არ არის. დეპუტატის ამ განცხადებას წინ უძღოდა ნიკა მელიას 24-საათიანი ულტიმატუმი ხელისუფლებისადმი.

"მიმაჩნია, რომ ნებისმიერი ადამიანის ჯანმრთელობის მდგომარეობა, თუ გაუმჯობესდება ნებისმიერი ფორმით, ეს არის ძალიან კარგი. ჩემი აზრით, მნიშვნელობა არ აქვს დეტალებში შევიდეთ, საკვების რა ფორმას ან ზომას ღებულობს, მთავარია, რომ ექიმების დასკვნით, ამ ეტაპზე მისი არცერთი სასიცოცხლო პარამეტრი არ არის კითხვის ნიშნის ქვეშ და ეს არის პოზიტიური ინფორმაცია. ამის შესაბამისად, ბუნებრივია, რომ არავის უკვე საფუძველი აღარ აქვს, რომ ამ ეტაპზე მოითხოვოს კერძო კლინიკაში გადაყვანა", — განაცხადა მან.

გუშინ, 6 ნოემბერს ნიკა მელიამ ხელისუფლებას 24-საათიანი ვადა მისცა, რომ ექსპრეზიდენტი, მიხეილ სააკაშვილი სამოქალაქო კლინიკაში გადაიყვანონ. წინააღმდეგ შემთხვევაში კი ორშაბათს თავისუფლების მოედანზე მასშტაბური აქცია დააანონსა.

სააკაშვილი უკვე 38-ე დღეა შიმშილობს. 6 ნოემბერს, ექსპრეზიდენტის მხარდამჭერი აქციის დაწყებამდე, პენიტენციურმა სამსახურმა გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა.

ეს ინფორმაცია მანამდე, 5 ნოემბერს იუსტიციის მინისტრმა, რატი ბრეგაძე გაავრცელა. 6 ნოემბერს სახალხო დამცველმა განაცხადა, რომ სააკაშვილის პატიმრობის პირობებისა და ჯანმრთელობის შესახებ განსაკუთრებული კატეგორიის პერსონალური მონაცემების გაცემისა და საჯაროდ გამოქვეყნების საკითხს შეისწავლიდა. მანვე აღნიშნა, რომ ექსპრეზიდენტი 30 ოქტომბრიდან წვენებსა და მინერალური შემცველობის პიურეებს სამედიცინო დანიშნულებით, მცირე ოდენობით იღებდა. მიღებული ინფორმაციის საფუძველზე ომბუდსმენი აცხადებდა, რომ სააკაშვილი პირველი ოქტომბრის შემდეგ უწყვეტად შიმშილობს და საკვებს არ იღებს.

სახელმწიფო ინსპექტორმა განაცხადა, რომ კადრების მოპოვებისა და გავრცელების კანონიერებას შეისწავლის და კიდევ ერთხელ ისაუბრა პირადი ცხოვრების ხელშეუხებლობის დაცვაზე.

თავად სააკაშვილი კადრების გამოქვეყნებას სამარცხვინოს და დანაშაულებრივს უწოდებს. თუმცა, მისივე თქმით, ვიდეოს გავრცელებით მას ვერაფერი დააკლეს, ხალხი დარწმუნდა, რომ შიმშილობს და "საუკეთესო ფორმაში არ იმყოფება". ის განმარტავს, რომ კადრებში ჩანს, როგორ იღებს დანამატებს სასიცოცხლო მაჩვენებლების დასარეგულირებლად, რაც მანამდეც იყო ცნობილი.