იუსტიციის მინისტრის, რატი ბრეგაძის განცხადებით, ექსპრეზიდენტის, მიხეილ სააკაშვილის მდგომარეობა სტაბილურია და გარკევული დროის შემდეგ მან ფაფები და წვენები მიიღო. ამის შესახებ ბრეგაძემ რუსთავი 2-ის ეთერში ისაუბრა.

"ექიმებთან გადამოწმებული ინფორმაციის საფუძველზე შემიძლია გითხრათ, რომ მისი ჯანმრთელობის მდგომარეობა არის სტაბილური და ყველა სასიცოცხლო მაჩვენებელი არის ნორმაში [...] დიახ, მან თავიდან, შემოსვლისას, როდესაც მან მიიღო საბანკო ბარათი, თავიდან შეიძინა გარკვეული პროდუქტები, შემდეგ განაცხადა უარი. გავიდა გარკვეული პერიოდი და ის დათანხმდა, საკუთარი სურვილით მიიღო გარკვეული ფაფები სხვადასხვა სახის და ნატურალური წვენები, ასევე, ის აგრძელებს იმ მედიკამენტების მიღებას, რომელიც გამოუწერეს ექიმებმა", — განაცხადა მან.

მისი თქმით, ამას იმიტომ ასაჯაროებს, რომ აღნიშნულზე უკვე პარლამენტის დეპუტატს უპასუხეს, რომელმაც იუსტიციის სამინისტროს მიხეილ სააკაშვილთან დაკავშირებული კითხვით მიმართა.

"ჩვენ მოგვმართა საქართველოს პარლამენტის წევრმა სადეპუტატო კითხვით, რომელზეც ვალდებული ვიყავით, გაგვეცა პასუხი. აქ იყო რამდენიმე შეკითხვა და ერთ-ერთი შეეხებოდა, დიახ, საკვებ პროდუქტებსაც. საუბარი იყო იმაზე, ადრე მიხეილ სააკაშვილმა შეიძინა თუ არა [პროდუქტები], დასმული იყო ასეთი შეკითხვაც. ასევე, ბუნებრივია, გრძელდება თუ არა, ამ პროდუქტების მიღება. ამის შესახებ ჩვენ უკვე პარლამენტს ვუპასუხეთ, ეს ინფორმაცია ისეც საჯარო გახდება", — განაცხადა მან.

ამის პარალელურად, დღეს ექსპრეზიდენტის ადვოკატმა, ნიკა გვარამიამ განაცხადა, რომ მიხეილ სააკაშვილის მდგომარეობა მძიმდება და მოსალოდნელია კოლაფსი. მისივე თქმით, ექსპრეზიდენტის ფსიქიკას და აზროვნებას უკვე ეტყობა სერიოზული კვალი.

დღეს სახელმწიფო ინსპექტორის სამსახურმა გაავრცელა განცხადება, სადაც ნათქვამი იყო, რომ მნიშვნელოვანია დაცული იყოს მოშიმშილე თავისუფლებააღკვეთილი პირის პირადი ცხოვრების ხელშეუხებლობა, მისი პერსონალური, განსაკუთრებით კი, მისი ჯანმრთელობის მდგომარეობის შესახებ მონაცემები. ინსპექტორის სამსახურმა მოუწოდა ყველას, განსაკუთრებული სიფრთხილით მოეკიდონ მოშიმშილე პატიმრის მიმართ თითოეული გადაწყვეტილების მიღებას და ყოველ ინდივიდუალურ შემთხვევაში შეაფასონ ადამიანის უფლებათა დარღვევის რისკები.

პატიმრის უფლებებზე ისაუბრა სახალხო დამცველის მოადგილემ, გიორგი ბურჯანაძემაც. მან განმარტა, რომ განცხადებები მოშიმშილე პატიმარზე დელიკატური უნდა იყოს, რათა მან შიმშილობის უფრო მკაცრ ფორმებს არ მიმართოს.

სააკაშვილი უკვე 36 დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს. ამ ეტაპზე სააკაშვილი უარს ამბობს ექიმების კონსილიუმთან თანამშრომლობაზე.