ექსპრეზიდენტი მიხეილ სააკაშვილი ციხიდან გამოგზავნილ მორიგ წერილში ამბობს, რომ მისი გათავისუფლებიდან 10 დღეში რიგგარეშე არჩევნები დაინიშნება. წერილი სააკაშვილთან შეხვედრის შემდეგ მისმა ადვოკატმა, დიმიტრი საძაგლიშვილმა წაიკითხა.

"ჩემი ციხიდან დახსნის პირობებში გაძლევთ სიტყვას, რომ მაქსიმუმ 10 დღეში მივაღწევთ რიგგარეშე არჩევნების დანიშნვნასა და დავდებთ ივანიშვილს ბეჭებზე. ჩვენ ახლა გვჭირდება ფართო საზოგადოებრივი ერთიანობა. თითოეულ მედგარ, გაუტეხელ ადამიანს დიდი მნიშვნელობა და ოქროს ფასი აქვს, ჩვენი ძალა ახლა ერთობაშია და გამარჯვების რეცეპტი ახლა მრავლრიცხოვნობაში და დაუღალაობაშია", — აცხადებს ის.

ამასთან, სააკაშვილი აღნიშნავს, რომ ოპოზიციამ ყველა ქალაქში მოიგო, თუმცა, შედეგები გააბათილეს. სააკაშვილი ხაზს უსვამს, რომ ბიძინა ივანიშვილს მხოლოდ მრავალჯერადი და მრავალრიცხოვანი აქციების ეშინია და ამიტომ საზოგადოებრივი ერთიანობაა საჭირო.

"ერთადერთი ივანიშვილს და მის ბანდას ეშინიათ სწორედ ჩვენი მრავალრიცხოვნების და მრავალჯერ ქუჩაში გამოსვლის. დასავლეთმა აბსოლუტურად ზუსტად დააფიქსირა საარჩევნო დარღვევები და ახლა მით მეტად დაგვიჭერს მხარს, რაც მეტი და მეტად გამოვალთ ქუჩებში. ახლა აუცილებლად შემოგვესევიან ექსპერტები და პოლიტიკანები ერთი ლოზუნგით, რომ შემგომ ქუჩაში ბრძოლას აზრი არ აქვს, მაინც არაფერი გამოვა, ჯერ ერთი, გარეთ არიან მაგარი, უკვე ბრძოლაში გამობრძმედილი ლიდერები, როგორიც განსაკუთრებით ნიკა მელიაა", — ამბობს სააკაშვილი.

გუშინ, პირველ ნოემბერს ექსპრეზიდენტმა, მიხეილ სააკაშვილმა ოპოზიციას პარლამენტის დატოვებისკენ მოუწოდა. მისი თქმით, პარლამენტმა უკვე დაკარგა სახელისუფლებო პლატფორმის ფუნქცია და იქ ვერანაირ გადაწყვეტილებას ვეღარ მიიღებენ.

ამის შემდეგ, რამდენიმე დეპუტატმა პარლამენტიდან გასვლის გადაწყვეტილება მიიღო. მათ შორის, ნაციონალური მოძრაობის წევრებმა, ნონა მამულაშვილმა და ანა წითლიძემ. პარლამენტს დატოვებს ლევან ვარშალომიძეც. სადეპუტატო მანდატზე უარს ამბობს გირჩი — მეტი თავისუფლების ლიდერი, ზურაბ ჯაფარიძეც. მანამდე, 31 ოქტომბერს გამართულ აქციაზე ლელოს ლიდერმა, მამუკა ხაზარაძემ მიიღო მანდატის დატოვების გადაწყვეტილება.

მიხეილ სააკაშვილი პირველ ოქტომბერს დააკავეს, ის დაკავების დღიდან, უკვე 33-ე დღეა შიმშილობს.