სტრატეგია აღმაშენებლის წარმომადგენლისა და პარლამენტარის, თეონა აქუბარდია განცხადებით, ექსპრეზიდენტს, მიხეილ სააკაშვილს უნდა ჰქონდეს სამოქალაქო კლინიკაში გადაყვანისა და სიცოცხლის უფლება. ამის შესახებ მან პარლამენტის პლენარულ სხდომაზე ისაუბრა.

"თუ რეალურად გვინდა, ქვეყანა წინ წავიდეს, მაშინ ჩვენ სასწრაფოდ უნდა შევხედოთ იმ გამოწვევას, რომელიც დღეს არის და მივცეთ მიხეილ სააკაშვილს, რომელიც დღეს შიმშილობს — მიუხედავად პოზიციებისა — მას ჰქონდეს იმ უფლების გამოყენების შესაძლებლობა, რაც თქვენ სხვა პატიმრებს მიეცით და მას ჰქონდეს სიცოცხლის უფლება, მათ შორის, სამოქალაქო საავადმყოფოში გადაყვანის მიზნით, იმისთვის, რომ შევამციროთ პოლარიზაცია და დავიწყოთ ქვეყნის პრობლემებზე საუბარი", — თქვა მან.

მიხეილ სააკაშვილი პენიტენციურ დაწესებულებაში უკვე 33 დღეა შიმშილობს. მან შიმშილობა დაკავების დღიდან გამოაცხადა. 29 ოქტომბერს ექსპრეზიდენტმა თქვა, რომ ის უარს ამბობს ექიმთა კონსილიუმთან თანამშრომლობაზე. მისი თქმით, ის აღარ ჩააბარებს ანალიზებს და არ მიიღებს შიმშილობის შემამსუბუქებელ მკურნალობას.

მანამდე, 28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

ექსპრეზიდენტის სამოქალაქო კლინიკაში გადაყვანის შესახებ ხელისუფლებას მოუწოდებენ პოლიტიკური პარტიები, ორგანიზაციები, სამედიცინო მუშაკები. თუმცა ისინი ამაზე უარს ამბობენ და აცხადებენ, რომ პენიტენციურ დაწესებულებაში შექმნილია ყველა პირობა იმისთვის, რომ პატიმარს უმკურნალონ. იუსტიციის მინისტრის, რატი ბრეგაძის თქმით, საჭიროების შემთხვევაში სააკაშვილს სწორედ ციხის სამედიცინო განყოფილებაში გადაიყვანენ. ამის წინააღმდეგია ექსპრეზიდენტი და ამბობს, რომ როგორიც არ უნდა იყოს მისი ჯანმრთელობის მდგომარეობა, უარს აცხადებს ციხის საავადმყოფოში გადაყვანაზე.