პრემიერმინისტრი ირაკლი ღარიბაშვილი აცხადებს, რომ მესამე პრეზიდენტის კერძო კლინიკაში გადაყვანის შემთხვევაში სახელმწიფო და სპეციალური სამსახურები მისი და კლინიკაში მყოფი სხვა მოქალაქეების უსაფრთხოებას სათანადოდ ვერ დაიცავენ.

"სრული პასუხისმგებლობით მინდა ვუთხრა ჩვენს მოსახლეობას, რომ ერთადერთი გეგმა, რაც შემუშავებული აქვთ, არის შემდეგი, რომ რაიმენაირად ჩვენ მას [მიხეილ სააკაშვილს] გადავიყვანდით კერძო კლინიკაში. მოგეხსენებათ, რომ კერძო კლინიკაში არანაირი პირობა არ არის, პაციენტია, კოვიდია, უამრავი მიმსვლელია, სამოქალაქო კლინიკაა, ბუნებრივია და არავითარი უსაფრთხოების ზომები არ არის დაცული. იქ სახელმწიფო და სპეციალური სამსახურები ვერ დაიცავენ სათანადო დონეზე მის და სხვების — კლინიკაში მყოფი სამოქალაქო პირების უსაფრთხოებას", — განაცხადა ღარიბაშვილმა იმედის ეთერში.

პრემიერი ამტკიცებს, რომ ენმ-ს ჰქონდა გეგმა, სააკაშვილის კერძო კლინიკაში გადაყვანის შემთხვევაში ქაოსი გამოეწვია. მეტიც, ის ოპონენტებს სავარაუდო მკვლელობის დაგეგმვაში ადანაშაულებს.

"თეორიულად მათ გეგმას რომ გავყვეთ, იმ შემთხვევაში, სააკაშვილს კერძო კლინიკაში თუ გადავიყვანდით, 4-5 ათასი ადამიანის მობილიზებას შეძლებდნენ და რა თქმა უნდა, მოგვიწევდა მუდმივი ქაოსი, ჯაჯგური, პოლიციას მოუწევდა ძალის გამოყენება, აქაც ვუბრუნდები იმ პირველს სცენარს, იგივე სცენარია დაწერილი, აბსოლუტურად ერთი-ერთში. მანდაც ანალოგიურად იგივე პროვოკაციებს მოახდენდნენ, შეიძლება რამდენიმე კაციც მოკლან, ეს არის მისი ერთადერთი, თეორიული, გიჟური სცენარი", — განაცხადა პრემიერმინისტრმა იმედის ეთერში.

28 ოქტომბერს ღარიბაშვილმა განაცხადა, რომ "შოუს", რასაც ყოფილი პრეზიდენტი, მიხეილ სააკაშვილი დგამს, ერთადერთი მიზანია, გადავიდეს კერძო კლინიკაში. ამასთანავე, ღარიბაშვილმა კიდევ ერთხელ აღნიშნა, რომ სააკაშვილის საქართველოში შემოსვლის ერთადერთი მიზანი რევოლუცია იყო.

მიხეილ სააკაშვილი პირველ ოქტობერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 29 დღეა შიმშილობს.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

საქართველოს ექიმთა საერთაშორისო ასოციაცია მოითხოვს, მიხეილ სააკაშვილი მრავალპროფილურ საავადმყოფოში გადაიყვანონ, სადაც საჭიროების შემთხვევაში ნებისმიერი პროფილის, დროული და კვალიფიციური სამედიცინო დახმარება, ამით კი მისი სიცოცხლის უფლება იქნება დაცული.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.