თბილისის მერობის კანდიდატი, ნიკა მელია აცხადებს, რომ სურს მიხეილ სააკაშვილმა შიმშილობა შეწყვიტოს. მელიას თქმით, "გამარჯვებულ ოპოზიციას" ჯანმრთელი სააკაშვილი სჭირდება.

"რა თქმა უნდა, უკვალოდ არ ჩაიარა მიხეილ სააკაშვილის, როგორც პოლიტიკოსის, როგორც თავდადებული ქართველის თავდადებამ და დარწმუნებული ვარ, ახლა ის ჩვენ გვიყურებს და მინდა აქედან მივესალმო მას დიდი პატივისცემით და ვუსურვო ჯანმრთელობა და ხვალ, როდესაც უკვე შემაჯამებელი ოქმები შედგება და გამოცხადდება ოპოზიციური კანდიდატები გამარჯვებულად, მე მასთან ციხეში შესვლის შესაძლებლობა არ მაქვს, მაგრამ ჩემი სურვილი იქნებოდა ახლა, როდესაც ოპოზიცია არის გამარჯვებული, მან შეწყვიტოს შიმშილობა. იმიტომ, რომ იგი გვჭირდება ჩვენ ჯანმრთელი და ცოცხალი ადამიანი და არ უნდა გავახაროთ ბიძინა ივანიშვილი", — განაცხადა ნიკა მელიამ.

არჩევნების მეორე ტურის დასრულებისთანავე გამოქვეყნდა ეგზიტპოლის ორი განსხვავებული შედეგი. მთავარი არხის ეგზიტპოლით, ოპოზიცია მეორე ტურში ყველა დიდ ქალაქში იგებს. ამ კვლევის მიხედვით თბილისში ნიკა მელიამ 51% მიიღო, ქართული ოცნების კანდიდატმა, კახა კალაძემ კი — 49%. რაც შეეხება ტელეკომპანია იმედის დაკვეთით ჩატარებულ ეგზიტპოლის შედეგების, ამ კვლევის მიხედვით 4 დიდ ქალაქში მმართველი გუნდის კანდიდატები იგებენ. იმედის ეგზიტპოლით თბილისში კახა კალაძემ აიღო 57,2%, ხოლო ნიკა მელიამ — 42,8%.

საქართველოს მესამე პრეზიდენტი, მიხეილ სააკაშვილი რუსთავის ციხეში დაკავებიდან, 31-ე დღეა შიმშილობს.