ხმის მიცემის დასრულებისა და ეგზიტპოლების შედეგების გამოცხადების შემდეგ, ქართული ოცნების მერობის კანდიდატი, კახა კალაძე თავის მხარდამჭერებს გამარჯვებას ულოცავს. მისი თქმით, მმართველმა პარტიამ არა უბრალოდ გამარჯვება, არამედ ღირსეული გამარჯვება მოიპოვა.

აღსანიშნია, რომ კალაძე მხოლოდ ერთი, იმედის დაკვეთით ჩატარებული ეგზიტპოლით იგებს.

"გილოცავთ ყველას, ძალიან ბედნიერი ვარ, ძალიან მიხარია, რომ ჩვენ შევძელით გამარჯვება მეორე ტურში, შევძელით არა უბრალოდ გამარჯვება, ღირსეული გამარჯვება, და ძალიან დიდი მადლობა თითოეულ ჩვენს მხარდამჭერს, ყველა იმ ადამიანს, ვინც მონაწილეობა მიიღო არჩევნებში და გადადგა სწორი ნაბიჯი, გააკეთა სწორი არჩევანი ქალაქთან დაკავშირებით, აღმშენებლობასთან, განვითარებასთან, სიმშვიდესთან და სტაბილურობასთან მიმართებით. დღეს ყველაზე მეტად რაც სჭირდება თბილისს, ეს არის განვითარება, ეს არის აღმშენებლობა, ეს არის სიმშვიდე და სტაბილურობა, ეს არის თქვენი დამსახურება და ძალიან დიდი მადლობა ამისთვის.

ჩემო მეგობრებო, მე რა თქმა უნდა, ჩემს გუნდთან ერთად მზად ვარ 24 საათიან რეჟიმში ვემსახურო ამ ქალაქს, მზად ვარ, დაუღალავი შრომით ვემსახურო ამ ქალაქს და ამ ქალაქში მცხოვრებ თითოეულ ადამიანს", — აცხადებს კალაძე.

გორბის მიერ ჩატარებული იმედის ეგზიტპოლის შედეგები ასეთია:

  • კახა კალაძე — 57,2%
  • ნიკა მელია — 42,8%

რადიკალურად განსხვავებული შედეგებია მთავარი არხის მიერ ჩატარებული ეგზიტპოლით, რომლის მიხედვითაც ნიკა მელია ლიდერობს, ეგზიტპოლის შედეგები შემდეგნაირად განაწილდა:

  • ნიკა მელია — 51%;
  • კახა კალაძე — 49%.

აღსანიშნია, რომ მეორე ტური 15 თვითმმართველ თემსა და 5 თვითმმართველ ქალაქში, მათ შორის, თბილისში გაიმართა. ასევე, 24 საარჩევნო ოლქში, რომლის შედეგად აირჩევა 42 მაჟორიტარი. მერობისა და მაჟორიტარობისთვის ჯამში 9 პარტიის, ასევე, ორი დამოუკიდებელი კანდიდატი იბრძვის.

დღის განმავლობაში გავრცელდა არაერთი ინფორმაცია დარღვევების, მათ შორის, ამომრჩეველზე ზეწოლისა და სავარაუდო მოსყიდვის შესახებ. ასევე, მოხდა დაპირისპირებები საარჩევნო უბნებთან. კოორდინატორები და აგიტატორები თავს დაესხნენ და ფიზიკური შეურაცხყოფა მიაყენეს ჟურნალისტებსაც.

გაიგეთ, როგორი იყო ამომრჩეველთა აქტივობა დღის განმავლობაში:

არჩევნების მიმდინარეობაზე დეტალური ინფორმაციის გასაგებად, თვალი ადევნეთ ჩვენს გვერდს, სადაც ინფორმაცია პირდაპირ ეთერში ახლდება.