მთავარი არხის ეგზიტპოლით, თბილისში ნიკა მელია 51%-ით ლიდერობს.

ეგზიტპოლის შედეგები შემდეგნაირად განაწილდა:

  • ნიკა მელია — 51%;
  • კახა კალაძე — 49%.

ეგზიტპოლი ჩატარდა მთავარი არხის დაკვეთით, გამოკითხვის პროცესი შეასრულა კომპანია ანოვამ. შედეგების დათვლაზე იმუშავა სტატისტიკოსების ჯგუფმა უცხოელ სპეციალისტებთან ერთად.

გამოკითხვა ჩატარდა დღეს, შემთხვევითი შერჩევის პრინციპით, პირისპირ ინტერვიუს საშუალებით, შესაძლო ცდომილების ზღვარი +/-3%-ია, შედეგები ასახავს 18:00 საათის მონაცემებს.

რადიკალურად განსხვავებულია ტელეკომპანია იმედის დაკვეთით გორბის მიერ ჩატარებული ეგზიტპოლის შედეგები, რის მიხედვითაც კალაძე ლკიდერობს. შედეგები შემდეგნაირად განაწილდა:

  • კახა კალაძე — 57,2%;
  • ნიკა მელია — 42,8%.

აღსანიშნია, რომ მეორე ტური 15 თვითმმართველ თემსა და 5 თვითმმართველ ქალაქში, მათ შორის, თბილისში გაიმართა. ასევე, 24 საარჩევნო ოლქში, რომლის შედეგად აირჩევა 42 მაჟორიტარი. მერობისა და მაჟორიტარობისთვის ჯამში 9 პარტიის, ასევე, ორი დამოუკიდებელი კანდიდატი იბრძვის.

დღის განმავლობაში გავრცელდა არაერთი ინფორმაცია დარღვევების, მათ შორის, ამომრჩეველზე ზეწოლისა და სავარაუდო მოსყიდვის შესახებ. ასევე, მოხდა დაპირისპირებები საარჩევნო უბნებთან. კოორდინატორები და აგიტატორები თავს დაესხნენ და ფიზიკური შეურაცხყოფა მიაყენეს ჟურნალისტებსაც.