პარტია საქართველოსთვის თავმჯდომარის, გიორგი გახარიას თქმით, მთავრობას მეტი გონიერება მართებს, რომ მიხეილ სააკაშვილის ჩამოსვლა ტრაგიკომედიად არ გადაიქცეს. ყოფილი პრემიერმინისტრი ყოფილ პრეზიდენტს პოლიტპატიმრად არ მიიჩნევს, მაგრამ აცხადებს, რომ სახელმწიფო ვალდებულია მის ჯანმრთელობაზე იზრუნოს.

"საერთოდ, სააკაშვილის საქართველოში ჩამოსვლა იყო ორგანიზებული კომედია, რომელიც არჩევნების წინა დღეს მოგვიწყვეს. ეს ყველაფერი გადაუვლის, ქართველი ამომრჩეველი დაფიქრდება ეს ყველაფერი როგორ ხდებოდა პირველი ტურის შემდეგ და მეორე ტურის შემდეგ. ვთქვი, რომ მთავრობას მეტი გონიერება მართებს, რომ ეს ტრაგიკომედია არ გახდეს.

რა თქმა უნდა, მიშა სააკაშვილი პოლიტპატიმარი არ არის, მაგრამ ეს, რა თქმა უნდა, არ ნიშნავს იმას, რომ სახელმწიფო აპარატმა ქვეყნის ყოფილი პრეზიდენტის ჯანმრთელობაზე არ უნდა იზრუნოს. რა თქმა უნდა, ყველა პატიმარს უნდა ჰქონდეს სრული ზრუნვა მათ ჯანმრთელობაზე. ეს სახელმწიფოს ვალდებულებაა. კიდევ ერთხელ მინდა ვუთხრა, ისე არ გააკეთონ, რომ სახელმწიფო და ქვეყანა დააზიანონ", — განაცხადა გიორგი გახარიამ.

საქართველოს მესამე პრეზიდენტი, მიხეილ სააკაშვილი დაკავებიდან, 30-ე დღეა შიმშილობს. გუშინ სააკაშვილმა განაცხადა, რომ იგი უარს ამბობს შიმშილობის შემამსუბუქებელ მკურნალობაზე. იუსტიციის მინისტრის მტკიცებით, სააკაშვილს მკურნალობაზე უარი არ უთქვამს იღებს ყველა იმ სითხეს, პრეპარატსა და აბს, რასაც იღებდა წინა დღეების განმავლობაში.

გაიგე მეტი: