პარტია საქართველოსთვის ბათუმის ორგანიზაციის ხელმძღვანელმა, ირაკლი თავდგირიძემ თანამდებობა დატოვა. თავდგირიძე აცხადებს, რომ მისთვის კატეგორიულად მიუღებელია ნაციონალურ მოძრაობასთან და პარტია ლელოსთან თანამშრომლობა.

"ჩემთვის ბათუმის საკრებულოს მომავალი წევრისთვის, კატეგორიულად მიუღებელია ნაცმოძრაობასთან (ლელოს ჩათვლით) ნებისმიერი სახით თანამშრომლობა, მითუმეტეს, მათთან კოალიცია და თანამდებობის გადანაწილებაზე კონსულტაციაც კი! შესაბამისად, ვტოვებ პარტია საქართველოსთვის ბათუმის ორგანიზაციის ხელმძღვანელის თანამდებობას და საკრებულოში საქმიანობას გავაგრძელებ როგორც დამოუკიდებელი დეპუტატი, ჩემი სინდისის კარნახით და ბათუმელების საკეთილდღეოდ!

არა ნაცებს‼️‼️ არა ბოროტებას‼️‼️ ნაცმოძრაობა ვერასოდეს იქნება ბათუმის უმრავლესობა საკრებულოში!" — წერს თავდგირიძე სოციალურ ქსელში.

On.ge დაუკავშირდა პარტია საქართველოსთვის პრესსამსახურს იმის გასარკვევად, ნიშნავს თუ არა თავდგირიძის განცხადება, რომ გახარიას პარტია ბათუმის საკრებულოში ენმ-სთან და ლელოსთან თანამშრომლობას აპირებს. პარტიაში ამ ეტაპზე დამატებით დეტალებზე არ საუბრობენ და განაცხადეს, რომ 12:00 საათზე ექნებათ ბრიფინგი ამ თემასთან დაკავშირებით.

7 ოქტომბერს, გიორგი გახარიამ ქართულ ოცნებასა და ნაციონალურ მოძრაობას ღია ფორმატში სამმხრივი მოლაპარაკებები შესთავაზა.

15 ოქტომბერს, ქართული ოცნების პოლიტსაბჭოს წევრმა, დეპუტატმა სოზარ სუბარმა განაცხადა, რომ საკრებულოში მოხვედრილ გახარიას პარტიის წევრებს "სწორ მხარეს" გადასვლაზე ელაპარაკებიან.