უკრაინელი ჟურნალისტის, დმიტრი გორდონის საქართველოში არშემოშვების მიზეზებზე საუბრისას ქართული ოცნების დეპუტატი სოზარ სუბარი აცხადებს, რომ სახელმწიფოს აქვს უფლება, თვითონ გადაწყვიტოს, თუ ვის შემოუშვებს ქვეყანაში და ვის არა. მისივე თქმით, აღნიშნულზე "თუ საჭიროდ ჩათვლის" სასაზღვრო სამსახურიც გააკეთებს კომენტარს.

"სახელმწიფოს აქვს უფლება, თვითონ გადაწყვიტოს ვისი შეშვება შეიძლება და ვისი არ შეიძლება, ამის უფლება აქვს სასაზღვრო სამსახურს. განმარტებასაც, თუ საჭიროდ ჩათვლიან, ისინი გააკეთებენ, ნებისმიერი მესაზღვრე არის აღჭურვილი უფლებამოსილებით, თვითონ მიიღოს გადაწყვეტილება კონკრეტულ ადამიანთან დაკავშირებით", — განაცხადა სუბარმა რუსთავი 2-ის ეთერში.

მისი თქმით, გორდონმა სააკაშვილის მხარდამჭერი განცხადებები მას შემდეგ გააკეთა, რაც მას ქვეყანაში შემოსვლაზე უარი უთხრეს, ამიტომ, საზღვარზე არშემოშვებასა და აღნიშნულ განცხადებას არ შეიძლება, პირდაპირი კავშირი ჰქონდეს. სუბარი ამბობს, რომ გორდონის მიერ სააკაშვილზე გაკეთებული განცხადებები არასწორია, ამიტომ, მას არ შეიძლება საქართველოს მეგობარი ეწოდოს.

"როდესაც ვლაპარაკობთ ჟურნალისტზე და თქვენ ამბობთ, რომ საქართველოს მეგობარია. საქართველოს მეგობარი თუ არის ადამიანი, მან ჯერ, პირველ რიგში, კეთილი უნდა ინებოს, გაეცნოს სისხლის სამართლის მასალებს და არ უნდა გააკეთოს არასწორი განცხადებები. არასწორი განცხადებები არის ის, რომ ეს სისხლის სამართლის საქმეები სააკაშვილის მიმართ არის ფალსიფირებული და ა.შ. როგორი განცხადებაც გააკეთა, ზუსტი ციტირება არ მახსოვს", — ამბობს ის.

კითხვაზე, შეიძლება თუ არა უკრაინელი ჟურნალისტის ქვეყნიდან გაბრუნებამ საერთაშორისო სკანდალი გამოიწვიოს, სუბარი ამბობს, რომ არა.

"არანაირი დიპლომატიური სკანდალი", — აღნიშნავს დეპუტატი.

27 ოქტომბერს უკრაინელმა ჟურნალისტმა, დმიტრი გორდონმა სოციალურ ქსელში დაწერა, რომ საქართველოში არ შემოუშვეს. ჟურნალისტის თქმით, მისთვის ქვეყანაში არშემოშვების მიზეზი არ დაუსახლებიათ. მისივე განცხადებით, ეს საერთაშორისო სკანდალი და სირცხვილია საქართველოს ხელისუფლებისთვის.