ქართული ოცნების თავმჯდომარე, ირაკლი კობახიძე აცხადებს, რომ აქციაზე მხარდამჭერების მოსაბილიზებლად ნამდვილად იმდენი მძღოლი დასჭირდათ, რამდენი ადამიანიც ნაციონალური მოძრაობის აქციაზე იყო. მისი თქმით, მათ შეკრებაზე მისული ადამიანების რაოდენობა ენმ-ის აქციაზე მისულებთან შედარებით "რამდენჯერმე მეტი" იყო.

"მე ვთქვი, რომ აქციაზე, შეკრებაზე ადამიანის მობილიზებისთვის დაგვჭირდებოდა იმდენი მარტო მძღოლი, რამდენიც ნაციონალებს ყავდათ გამოყვანილი საკუთარ აქციაზე. ეს არ იყო მარტო სიტყვის მასალად ნათქვამი. რეალურად, ამდენი მძღოლი დაგვჭირდა ჩვენ იმისათვის, რომ მოგვეხდინა ჩვენი მხარდამჭერების მობილიზება, ანუ ჩვენი შეკრების მონაწილეთა რაოდენობა იყო რამდენჯერმე მეტი. დაითვალონ საკუთარი აქციის მონაწილეთა რაოდენობა და ამის მიხედვით გადავუმრავლებ მე ჩვენი აქციის მონაწილეთა რაოდენობას", — აცხადებს კობახიძე.

ქართული ოცნების თავმჯდომარის თქმით, აქციაზე მუხტი და შეძახილებიც კი ცხადყოფს, რომ მხარდამჭერები იძულებით არ მიუყვანიათ და ყველა თავისი ნებით მივიდა.

"როდესაც ხდება ადამიანების იძულება, იქ მუხტი არ იქმნება და თქვენ ნახეთ გუშინ როგორი იყო მუხტი. გუშინ გახსოვთ შეძახილები "საქართველოს გაუმარჯოს" და თქვენ აქციაზე, როდესაც იყო ანალოგიური პათოსი, იქ ისმოდა შეძახილები "თავისუფლება მიშას". იქით იდგა მიშა, თქვენი დამნაშავე ბელადი, აქეთ იდგა საქართველო. ეს არის განსხვავება ორ შეკრებას შორის", — განაცხადა კობახიძემ.

25 ოქტომბერს ირაკლი კობახიძემ განაცხადა, რომ პარტიის დაანონსებულ შეკრებაზე იმდენი მარტო მძღოლი იქნება საჭირო, რამდენი ადამიანიც ნაციონალური მოძრაობის აქციაზე იყო. ჟურნალისტის კითხვაზე, არის თუ არა ეს შეკრება 14 ოქტომებერს ჩატარებული აქციის კონტრაქცია, კობახიძემ განაცხადა, რომ არა და აღნიშნულს ენმ-ის მესიჯბოქს უწოდა.

გუშინ, 27 ოქტომბერს, მმართველმა პარტიამ თავისუფლების მოედანზე ერთსაათიანი აქცია გამართა. ქართული ოცნების ლიდერების განცხადებების უდიდესი ნაწილი, ტრადიციულად, ნაციონალური მოძრაობის კრიტიკასა და მიხეილ სააკაშვილზე საუბარს დაეთმო.

გაიგე მეტი: