Toy Story-ის მოყვარულებისთვის განსაკუთრებული სიახლე გვაქვს: დისნეი და პიქსარი ანიმაციის ერთ-ერთი მთავარი გმირის, ბაზ ლაითიერის შესახებ ახალ ანიმაციურ ფილმს, სახელად Lightyear გამოუშვებენ. ფილმში ბაზს ყველასათვის საყვარელი კაპიტანი ამერიკა — კრის ევანსი გაახმოვანებს.

ფილმში იმ ცნობილი გმირის რეალურ ისტორიას გავიგებთ, რომლის მიხედვითაც სათამაშოების ისტორიაში ბაზ ლაითიერის სათამაშოა შექმნილი. ახალ ანიმაციაზე Finding Dory-ის ერთ-ერთი შემქმნელი ანგუს მაკლეინი იმუშავებს. Lightyear-ის მსოფლიო პრემიერა კინოთეატრებში 2022 წლის 17 ივნისს შედგება.

ახალ ფილმში ბაზ ლაითერის გახმოვანებით, გულშემატკივრების გარდა, თავად კრის ევანსიც აღფრთოვანებულია. მისი თქმით, ანიმაციაზე მუშაობა მისი ოცნება იყო.

"ყველამ, ვინც მიცნობს, იცის, რომ ანიმაციური ფილმები ძალიან მიყვარს. არ მჯერა, რომ პიქსარის ოჯახის წევრი ვიქნები და იმ საოცარ ხელოვანებთან ერთად მუშაობის შესაძლებლობა მექნება, რომლებიც ისტორიებს შეუდარებლად ყვებიან. იმის ყურება, თუ როგორ მუშაობენ, ნამდვილად ჯადოსნური პროცესია", — ამბობს კრის ევანსი.

სათამაშოების ისტორიის პირველი ნაწილი ჯერ კიდევ 1995 წელს გამოვიდა და ის პოპულარულობას დღემდე არ კარგავს. სათამაშოების ისტორიაში ბაზს აქამდე ტიმ ალენი ახმოვანებდა.