"თქვენ მოგიწვევთ აუცილებლად" — ასე პასუხობს ჯანდაცვის მინისტრი, ეკატერინე ტიკარაძე ჟურნალისტის კითხვას, თუ როდის აპირებს მინისტრი მეორე დოზით აცრას. მისი თქმით, სამედიცინო მანიპულაციის გასაჯაროვება არ შეიძლება, თუმცა მისი პირველი დოზით აცრისას ჟურნალისტებს "იმდენად ცხოველური ინტერესი" ჰქონდათ, რომ მან ეს ფაქტი გაასაჯაროვა.

"საერთოდ ვთვლი, რომ ნებისმიერი სამედიცინო მანიპულაცია, არის ადამიანის ინდივიდუალური საკითხი და არ შეიძლება ამის გასაჯაროვება. პირველ დოზაზე იმდენად ცხოველური ინტერესი გაგაჩნდათ, რომ ეს გავაკეთე, თუმცა ეს არღვევს აბსოლუტურად ადამიანის თითოეულ უფლებას", — აცხადებს ტიკარაძე.

მინისტრმა კორონავირუსის საწინააღმდეგო ვაქცინა AstraZeneca-ს პირველი დოზა 23 მარტს გაიკეთა. ის საჩხერის სამედიცინო ცენტრში პირდაპირ ეთერში აიცრა. 1 ივნისს კი ეკატერინე ტიკარაძეს კორონავირუსი დაუდასტურდა.