რუსეთის ოპოზიციური პარტიის ლიდერი, ალექსეი ნავალნი მოსკოვში მისივე ორგანიზებული ანტიკორუფციული პროტესტის დროს დააკავეს. ნავალნის გარდა, სულ მცირე, ხუთასი მომიტინგე დააკავეს დედაქალაქსა და ქვეყნის მასშტაბით.

დემონსტრაციები მოსკოვის გარდა, გაიმართა სანკტ-პეტერბურგში, ვლადივასტოკში ნოვოსიბირსკსა და კიდევ რამდენიმე ქალაქში.

BBC-ის ცნობით, მსვლელობებში ათასობით ადამიანი მონაწილეობდა. ისინი რუსეთის პრემიერმინისტრის, დიმიტრი მედვედევის გადადგომას მოითხოვდნენ და მას კორუფციულ გარიგებებში ადანაშაულებდნენ.

დემონსტრანტები სკანდირებდნენ: "ძირს პუტინი", "პუტინი რუსეთის გარეშე", "პუტინი ქურდია".

ალექსეი ნავალნი მაშინვე დააკავეს, როგორც კი აქციას შეუერთდა. მოგვიანებით კი, მან ტვიტერის საკუთარ გვერდზე მოუწოდა აქციის მონაწილეებს, რომ განაგრძონ ბრძოლა კორუფციის წინააღმდეგ და რომ საჭირო არ არის მისი ციხიდან დახსნა.

ნავალნის ინფორმაციით, პოლიცია შევიდა მის ოფისშიც და მისი თანამშრომლები დააკავა, რომლებიც საპროტესტო აქციას პირდაპირი ეთერით გადასცემდნენ.