ქართული ოცნების აღმასრულებელი მდივანი, მამუკა მდინარაძე აცხადებს, რომ როდესაც ქართული ოცნება ოპოზიციაში გადავა, ისინი აჩვენებენ სტანდარტს, თუ როგორი უნდა იყოს ოპოზიცია. თუმცა მდინარაძის თქმით, ეს ვერ მოხდება მანამ, სანამ მთავარ ოპოზიციურ ძალად ნაციონალური მოძრაობა იქნება. მდინარაძე აღნიშნავს, რომ კოალიციასა და სხვა რაღაცებზე საუბარი იმ შემთხვევაშია შესაძლებელი, თუ ახალი პოლიტიკური ძალები გამოჩნდებიან.

"როცა ქართული ოცნება, ეს არ ვიცი 2024 იქნება, 2028, თუ როცა იქნება, სულ ხელისუფლებაში ხომ ვერ ვიქნებით, ოპოზიციაში იქნება, ჩვენ ვაჩვენებთ სტანდარტს, როგორი უნდა იყოს ოპოზიცია. მაგრამ, ეს ვერ მოხდება იმ პირობებში, როცა "ნაცმოძრაობა" არის მეორეადგილოსანი. თუ ახალი ძალები წამოვლენ წინ, ამ შემთხვევაში კოალიციაზე რომ ვსაუბრობთ და ბევრ რაღაცაზე, ადვილია საუბარი. მაგრამ, როდესაც შენ წარსულის უმძიმესი ცოდვების გარდა დღევანდელი ცოდვებით დამძიმებული პოლიტიკური ძალა გყავს მთავარი ოპონენტი, ეს მოცემულობა უნდა შეიცვალოს და მერე ვილაპარაკოთ ყველაფერზე", — განაცხადა მდინარაძემ იმედთან.

ამასთანავე, მდინარაძემ აღნიშნა, რომ მათ თვითმმართველობის მეორე ტურის წინასაარჩევნო პერიოდში "საკმაოდ ნეგატიური" კამპანია წამოიწყეს, რათა თუ ვინმეს პოლიტიკურ მეხსიერებასთან დაკავშირებული პრობლემები აქვს წარსული გაახსენონ. მისი თქმით, ნაციონალურ მოძრაობასთან წაგება შეუძლებელია და სწორედ ამიტომ არიან "დიდ გულზე" და "შეტევაზე".