საქართველოს ყოფილი პრეზიდენტი მიხეილ სააკაშვილი ტელეკომპანია რუსთავი 2-ის მართვაზე მფლობელებსა და კოლექტივს შორის მიმდინარე დებატებს ეხმუარება და ფეისბუქის საკუთარ გვერდზე წერს, რომ ყველა ტელევიზია უნდა მართონ ჟურნალისტებმა და იმ ადამიანებმა, ვინც ქმნის ტელეპროდუქციას.

სააკაშვილი მიიჩნევს, რომ ტელეკომპანია რუსთავი 2-ის 91 პროცენტის მფლობელი ძმები ყარამანიშვილების წინადადება, კოლექტივისთვის წილების განაწილებაზე უპრეცენდენტოა და დასაფასებელი. მისივე თქმით, ძმებმა ზეწოლის მიუხედავად, ბიძინა ივანიშვილის გარიგება არ მიიღეს:

"ძმები ყარამანიშვილები მაგრად დაუდგნენ ივანიშვილს და არ წავიდნენ არანაირ გარიგებაზე, მიუხედავად დიდი ზეწოლისა. თუ როგორ და რა ფორმით უნდა მოხდეს შეთავაზების რეალიზება, ამას მენეჯმენტი, კოლექტივი და მფლობელები, დიდი იმედი მაქვს, ერთმანეთთან დიალოგის გზით გადაწყვეტენ და ერთობლივი ქმედებებით განავითარებენ საქართველოში დარჩენილ ბოლო დემოკრატიულ ინსტიტუტს - რუსთავი 2-ს.

მე ვარ თითოეული რუსთავიორელის გულშემატკივარი. აღფრთოვანებული ვარ, მათი გამბედაობით და პატრიოტიზმით. მიმაჩნია, რომ ნიკა გვარამიას როლი ტელევიზიისთვის ურთულეს პერიოდში, პირადი საფრთხის ფასად, იყო ძალიან მნიშვნელოვანი. მან არაერთხელ დაამტკიცა თავისი, როგორც ხელმძღვანელის ეფექტურობა და ის, რომ მას, როგორც მენეჯერს დიდი სარგებელის მოტანა შეუძლია".