პრემიერმინისტრ ირაკლი ღარიბაშვილის განცხადებით, ზუგდიდში ნაციონალური მოძრაობის მერობის კანდიდატს, ანზორ მელიას მუნიციპალიტეტის მართვის "წარმოდგენა არ აქვს", ხოლო ქართული ოცნებას "ღირსეული ზუგდიდელი" და "უწესიერესი კაცი" ჰყავს კანდიდატად. ანზორ მელიაზე საუბრის დაწყებამდე ღარიბაშვილმა თქვა, რომ ოპონენტზე საუბარი არ სურდა, თუმცა მაინც ისაუბრა.

"რა თქმა უნდა, მე არ მინდა ვისაუბრო ჩვენი კანდიდატის ოპონენტზე. ანზორ მელია, რა თქმა უნდა, შეიძლება არის დამსახურებული ექიმი, მაგრამ მე ძალიან მაინტერესებს და კითხვა მინდა დავუსვა თითოეულ ზუგდიდელს, რა მოტივაცია აქვს ამ კაცს, როგორ უნდა მართოს ზუგდიდი კაცმა, რომელმაც არ იცის ან ბიუჯეტი, რამდენი სოფელია ამ ქალაქში, საერთოდ წარმოდგენა არ აქვს როგორ იმართება მუნიციპალიტეტი. ამ დროს ჩვენ გვყავს ძალიან გამოცდილი, უწესიერესი კაცი, ბატონი მამუკა წოწერია, რომელიც ღირსეული ზუგდიდელია, რომელიც არ შეარცხვენს ზუგდიდელებს და ზუგდიდს, ამ ქალაქს", — განაცხადა ღარიბაშვილმა.

პრემიერმინისტრის თქმით, იმ შემთხვევაში, თუ მელია გაიმარჯვებს, შეუძლებელი იქნება მასთან ურთიერთობა და მოხდება ცენტრალურ ხელისუფლებასთან კომუნიკაციის წყვეტა, ეს კი ზუგდიდელებს დააზარალებს.

"დავუშვათ, ჰიპოთეტურად წარმოვიდგინოთ, რომ ანზორ მელია არის ზუგდიდის მერი. ეს ხომ ნიშნავს იმას, რომ წყვეტა მოხდა ცენტრალურ ხელისუფლებასთან. როგორ შეიძლება, რომ მთავრობას ამ ადამიანთან ან ამ ძალასთან ჰქონდეს ნორმალური, კონსტრუქციული ურთიერთობა, ამით ხომ დაიჩაგრება ისევ ჩვენი ხალხი, ჩვენი მოსახლეობა — ზუგდიდელები. ამიტომ, რა თქმა უნდა, ჩვენ ამ არჩევნებს მოვიგებთ ყველა მუნიციპალიტეტში", — აცხადებს პრემიერმინისტრი.

2 ოქტომბერს ჩატარებული თვითმმართველობის არჩევნების შედეგად, ნაციონალური მოძრაობის ზუგდიდის მერობის კანდიდატმა, ანზორ მელიამ ხმების 46,88% აიღო, ხოლო ქართული ოცნების კანდიდატმა, მამუკა წოწერიამ — 41,15%. ზუგდიდი ერთ-ერთია იმ ქალაქებშორის, სადაც 30 ოქტომბერს არჩევნების მეორე ტური გაიმართება.